ՍՈՒՔՐԵ, 10 ԱՊՐԻԼԻ, ՆՈՅՅԱՆ ՏԱՊԱՆ: Բոլիվիայի նախագահ Էվո
Մորալեսը եւ իրեն սատարող արհմիութենական առաջնորդները հացադուլ են
հայտարարել ի նշան բողոքի ընդդիմադիր խորհրդարանականների դեմ,
որոնք ձգձգում են նոր նախընտրական օրենքի ընդունումը:
Բոլիվիայի նոր Սահմանադրության համաձայն, որն ուժի մեջ է մտել
փետրվարի 7-ին համաժողովրդական հանրաքվեով հավանության
արժանանալուց հետո, դեկտեմբերի 6-ին երկրում պետք է կայանան
համընդհանուր ընտրություններ, որոնց ընթացքում քաղաքացիները
կընտրեն նախագահ, փոխնախագահ եւ խորհրդարանի անդամներ: Բոլիվիական
ընդդիմությունը մտադիր է բոյկոտել ընտրությունները, քանի որ նրա
մեջ մեծ տարաձայնություններ են ծագել իշխանությունների հետ նոր
նախընտրական օրենքի որոշ կետերի պատճառով:
Հացադուլ սկսելու մասին Մորալեսը եւ Բոլիվիայի բանվորական
կենտրոնի ղեկավարները հայտարարել են ապրիլի 9-ին հրապարակված
փաստաթղթում: Ընդդիմադիրների կարծիքով, կառավարությունը ցանկանում
է խաբել քաղաքացիներին եւ ընդունել «մթին եւ որոգայթներով լի»
օրենք: