Վանեցյանը պատգամավորական մանդատը վայր դնելու դիմում է ներկայացրել
21-06-2022 13:11:08 | Հայաստան | Ի՞նչ է գրում մամուլը
Ազատություն․ «Պատիվ ունեմ» ընդդիմադիր խմբակցության ղեկավար, Ազգային անվտանգության ծառայության նախկին տնօրեն Արթուր Վանեցյանը մանդատը վայր դնելու դիմում է ներկայացրել Ազգային ժողովի նախագահ Ալեն Սիմոնյանին։ «Ազատությանն» այս մասին հայտնեց ԱԺ նախագահի խոսնակ Ծովինար Խաչատրյանը:
Ազգային ժողովի կանոնակարգ օրենքի համաձայն՝ Արթուր Վանեցյանի լիազորությունները կդադարեցվեն նրա հրաժարականի մասին ԱԺ նախագահի հայտարարությունից մեկ շաբաթ անց, եթե նա հետ չվերցնի իր դիմումը։
Ֆեյսբուքյան իր էջում, անդրադառնալով մանդատը վայր դնելու իր որոշմանը՝ Վանեցյանը, մասնավորապես, գրել է՝ իրեն այլևս չի տեսնում այս խորհրդարանում․ - «ՀՀ քաղաքացին մեզ քվե էր տվել այս իշխանությունների կործանարար գործունեությունը կասեցնելու և երկիրն աղետից դուրս բերելու համար։ Սակայն այս խորհրդարանը, իմ կարծիքով, դադարել է լինել նպատակին հասնելու արդյունավետ հարթակ»։
«Հայրենիք» կուսակցությունն, ըստ պատգամավորի, կշարունակի գործունեությունը խորհրդարանից դուրս, և դադարում է գոյություն ունենալ ՀՀԿ-ի հետ ձևավորած «Պատիվ ունեմ» դաշինքը։
Ընդգծելով, որ պատգամավորական մանդատն իր համար երբեք ինքնանպատակ չի եղել, այն ընդամենը գործիք էր երկրին ու պետականությանը ծառայելու համար՝ Վանեցյանը շեշտել է՝ այդ գործիքն այսօր այլևս իր համար կիրառելի չէ։
«Մենք այսօր կանգնած ենք հայրենազրկման շեմին և սխալվելու իրավունք այլևս չունենք։ Պայքարն այլընտրանք չունի, և ինչպես բազմիցս նշել եմ՝ այսօր հանուն հայ ժողովրդի, Հայաստանի և Արցախի պայքարում կուսակցական դրոշներ, բաժանարար գծեր ու կարգավիճակներ չկան։ Սա մեր համազգային պայքարն է, և մենք՝ «Հայրենիք» կուսակցության անդամներս, շարունակելու ենք այն մեր ժողովրդի հետ միասին», - եզրափակել է Արթուր Վանեցյանը։
ՀԱՅԵՐԵՆ
Русский
English
Դաս. հայերեն
French
