Բողոքներ կային, որ շտապօգնությունում զանգերին չեն պատասխանում․ ծառայությունը հետադարձ կապ է հաստատում քաղաքացիների հետ
28-06-2022 20:39:03 | Հայաստան | Ի՞նչ է գրում մամուլը
Երկու ամսից ավելի է, ինչ «Շտապօգնություն» ընկերության զանգերի կենտրոնում գործում է հետադարձ հեռախոսազանգի համակարգը։ Այս համակարգի նպատակը հետևյալն է. երբ քաղաքացիները զանգահարեն «Շտապօգնություն»՝ կանչ գրանցելու համար, սակայն զբաղվածության պատճառով չկարողանան կապ հաստատել օպերատորի հետ, վերջինս կարողանա հետ զանգել առաջին օգնության կարիք ունեցող անձին:
«Շտապօգնություն» ՓԲԸ-ի տնօրենի խոսքով՝ ներդրված և արդեն իսկ գործող համակարգի շնորհիվ 1-03 հեռախոսահամարի մուտքային բոլոր զանգերը գրանցվում են, և քաղաքացիների հետ ապահովվում է հետադարձ կապ: Թագուհի Ստեփանյանը «Հայկական ժամանակի» հետ զրույցում արձանագրում է՝ զանգերի կենտրոնում ներդրված նոր համակարգը բավականին հեշտացրել է ծառայության աշխատանքը։
«Որևէ դժվարություն չկա, հակառակը, ամեն ինչ շատ պարզ է և արագ։ Նախկինում լինում էր, որ չէինք կարողանում անմիջապես պատասխանել բոլոր կանչերին, այժմ նման դեպքերում արագ կարողանում ենք հետադարձ կապ հաստատել կանչ գրանցելու համար զանգահարած քաղաքացու հետ։ Համակարգի ստեղծման անհրաժեշտությունն առաջացել էր մեծ թվով կանչեր գրանցվելու պատճառով»,- նկատում է նա։
Ըստ Ստեփանյանի՝ նախկինում, երբ զբաղվածության պատճառով «Շտապօգնության» օպերատորները չէին կարողանում անմիջապես պատասխանել քաղաքացիների զանգերին, վերջիններս պարբերաբար դժգոհում էին: Նոր համակարգի շնորհիվ այդ դժգոհությունները այլևս չկան։
Տնօրենը մանրամասնում է՝ համակարգի հետադարձ կապը գործում է ինչպես սովորական բջջային հեռախոսների դեպքում, այնպես էլ՝ քաղաքայինի: Այսինքն, երբ բաց թողնված զանգ է լինում, այդ մասին SMS հաղորդագրություն է ստանում օպերատորը:
«Այսօր մեր կանչերի թիվը պակասել է, բայց շատ կանչերի դեպքում բավականին բողոքներ կային, որ շտապօգնությունում հեռախոսազանգերին չեն պատասխանում: Մտածում էին՝ ծառայության աշխատակիցները չեն պատասխանում իրենց զանգերին: Համակարգը ներդրվել է հենց դրա համար, որ մեր քաղաքացիների զանգերն անպատասխան չմնան»,- վստահեցնում է զրուցակիցը:
«Շտապօգնություն» տնօրենի փոխանցմամբ՝ այս շրջանում շտապօգնության կանչերի թիվը օրական շուրջ 700 կանչի է հասնում, սակայն ամիսներ առաջ շուրջ 1000-ի սահմանում էր: Շտապօգնության ծառայությունում գոյություն ունի նաև, այսպես ասած, «պիկ ժամերի» հասկացություն, այսինքն, երբ ծառայությունը ամենաշատ զանգերն է ստանում: Այս առումով ևս նոր համակարգը բավականին արագացրել է աշխատակիցների արձագանքման գործընթացը:
«Դա հիմնականում երեկոյան ժամերին է լինում: Տարբեր առողջական խնդիրների հետևանքով են գրանցվում կանչերը, օրինակ՝ երեկոյան ժամերին ճնշման հետ կապված խնդիրներ են առաջանում, ցավեր մարմնի տարբեր շրջաններում, սիրտանոթային ու սուր-շնչառական հիվանդությունների սրացում և այլն»,- մանրամասնում է Ստեփանյանը:
Այժմ «Շտապբուժօգնություն» ընկերությունում 50 բրիգադ կա, յուրաքանչյուրում՝ 3 մասնագետ՝ մեկ բժիշկ, մեկ բուժքույր և վարորդ:
Նոր համակարգի համար Երևանի քաղաքապետարանը համագործակցում է Հայաստանի բջջային հաղորդակցության ընկերություններից մեկի հետ:
ՀԱՅԵՐԵՆ
Русский
English
Դաս. հայերեն
French
