Վրացական ՀԿ-ները պահանջում են վիզային ռեժիմ սահմանել Ռուսաստանի քաղաքացիների համար
17-08-2022 16:00:52 | Հայաստան | Ի՞նչ է գրում մամուլը
Lragir.am. Վրաստանի 20-ից ավելի առավել ազդեցիկ հասարակական կազմակերպություններ ստորագրել են համատեղ հայտարարություն՝ պահանջելով իշխող «Վրացական երազանք» կուսակցությունից և Իրակլի Ղարիբաշվիլիի կառավարությունից անհապաղ վիզային ռեժիմ սահմանել Ռուսաստանի քաղաքացիների համար։ Հասարակական կազմակերպությունների ղեկավարներին հատկապես անհանգստացրել է կառավարության, ինչպես նաև Զբոսաշրջության ազգային վարչության կողմից նախօրեին հրապարակված վերջին վիճակագրությունը, գրում է Կոմերսանտը։
«2022 թվականի հունվարից հուլիս ընկած ժամանակահատվածում զգալիորեն աճել է Ռուսաստանի Դաշնությունից Վրաստան մարդկանց ժամանման տեմպերը»,- նշում են նամակի հեղինակները։ Բացի այդ, նրանք նշում են, որ Ուկրաինայում պատերազմի մեկնարկից հետո «Վրաստանում գրանցված է մոտ 6,4 հազար ռուսական ընկերություն, ինչը յոթ անգամ գերազանցում է ամբողջ 2021 թվականի ցուցանիշը»։
ՀԿ-ները որպես սպառնալիք են դիտարկում դեպի Ռուսաստան արտահանման զգալի աճը՝ Ռուսաստանի Դաշնության դեմ միջազգային պատժամիջոցների համատեքստում, իսկ ՌԴ քաղաքացիների զանգվածային հոսքը և բիզնեսների բացումը Վրաստանում, ինչպես նշված է փաստաթղթում, վկայում է այն մասին, որ ռուսներն օգտագործում են Վրաստանը «մեղմացնելու Ռուսաստանի Դաշնության դեմ միջազգային պատժամիջոցների ազդեցությունը»։
Ոչ առևտրային կազմակերպությունները հիշեցնում են, որ Ռուսաստանի քաղաքացիների՝ Վրաստան մուտք գործելու և նրանց կողմից ձեռնարկությունների բացման նկատմամբ վերահսկողությունը «երկրի ազգային անվտանգության հարց է»։ Նրանց կարծիքով՝ Ռուսաստանը կարող է օգտագործել Վրաստանում իր մեծ թվով քաղաքացիների ներկայությունը «ռուսներին պաշտպանելու պատրվակով Վրաստանի մնացած տարածքը գրավելու համար»։
ՀԱՅԵՐԵՆ
Русский
English
Դաս. հայերեն
French
