«Պատրաստ ենք որքան հնարավոր է շուտ անցկացնել ԱԳ նախարարների հետաձգված եռակողմ հանդիպումը»․ Բայրամով
20-01-2023 12:07:05 | Հայաստան | Ի՞նչ է գրում մամուլը
Ազատություն. Ադրբեջանի արտգործնախարար Ջեյհուն Բայրամովը հայտարարել է Հայաստանի, Ադրբեջանի և Ռուսաստանի արտաքին գործերի նախարարներ եռակողմ հանդիպում անցկացնելու Բաքվի պատրաստակամության մասին։
«Մենք պատրաստ ենք որքան հնարավոր է շուտ անցկացնել Ադրբեջանի, Հայաստանի և Ռուսաստանի արտգործնախարարների հետաձգված եռակողմ հանդիպումը»,- այսօր լրագրողներին ասել է Բայրամովը՝ հավելելով, որ «այժմ ամեն ինչ կախված է հակառակ կողմից»։
Հայկական կողմը խնդրել էր հետաձգել Մոսկվայում դեկտեմբերի 23-ին նախատեսված Հայաստանի, Ռուսաստանի և Ադրբեջանի արտգործնախարարների հանդիպումը՝ պարզաբանելով, որ այս պահին Արարատ Միրզոյանի առաջնահերթությունը Լաչինի միջանցքի անխոչընդոտ վերագործարկման և Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է:
Բայրամովն այսօր ասել է, որ խաղաղության օրակարգի առաջմղումը միշտ եղել է Ադրբեջանի նախաձեռնությունը, «և մեր բոլոր հիմնարար սկզբունքները ներկայացված են Հայաստանին»։
Անդրադառնալով Լաչինի ճանապարհին տիրող իրավիճակին՝ նա ասել է, թե դրանով ականներ, զենք ու զինամթերք տեղափոխելն անթույլատրելի է։
ՀԱՅԵՐԵՆ
Русский
English
Դաս. հայերեն
French
