Լավրովն ու Միրզոյանը կարևորել են հայ-ադրբեջանական կարգավորման ջանքերի ակտիվացումը
03-03-2023 14:10:56 | Հայաստան | Ի՞նչ է գրում մամուլը
Ազատություն. Մարտի 3-ին Նյու Դելիում «Ռայսինայի երկխոսություն» 8-րդ միջազգային համաժողովի շրջանակում հանդիպում են ունեցել Ռուսաստանի և Հայաստանի արտգործնախարարներ Սերգեյ Լավրովը և Արարատ Միրզոյանը։
Նախարարները քննարկել են երկկողմ օրակարգի արդիական հարցեր, ինչպես նաև ճշտել են մոտեցումները միջազգային հարթակներում՝ ինտեգրացիոն միավորումներում համագործակցության շրջանակներում, հայտնում է Ռուսաստանի դիվանագիտական գերատեսչության մամլո ծառայությունը։
Աղբյուրի համաձայն՝ Լավրովն ու Միրզոյանը նաև մտքեր են փոխանակել տարածաշրջանային խնդիրների շուրջ, կարևորել են հայ-ադրբեջանական կարգավորման բոլոր ուղղություններով ջանքերի ակտիվացումը՝ համաձայն Հայաստանի, Ադրբեջանի և Ռուսաստանի ղեկավարների միջև ձեռք բերված պայմանավորվածությունների:
«Բանակցություններն անցել են բարեկամական և վստահելի մթնոլորտում։ Պայմանավորվածություն է ձեռք բերվել հետագա դիվանագիտական շփումների վերաբերյալ», - ասվում է ռուսական կողմի հաղորդագրությունում:
Հայկական կողմը հանդիպման մասին պաշտոնական հաղորդագրություն դեռ չի տարածել:
ՀԱՅԵՐԵՆ
Русский
English
Դաս. հայերեն
French
