Ազատություն. Ադրբեջանի ռազմական գերատեսչությունը նաև մեղադրում է Ռուսաստանի պաշտպանության նախարարությանը:

 

Պաշտոնական Բաքուն կրկին հայտարարում է, թե Լաչինի միջանցքում անհրաժեշտ է վերահսկողության ռեժիմ ապահովել, ինչպես նաև սպառնում է «ձեռնարկել վճռական, անհրաժեշտ միջոցներ՝ զինաթափելու և չեզոքացնելու անօրինական զինված կազմավորումները»։

 

Ադրբեջանի պաշտպանության նախարարությունը հայտարարությամբ է հանդես եկել՝ պնդելով, թե Հայաստանը շարունակում է ռազմական փոխադրումները Արցախ: «Եվս մեկ անգամ զգուշացնում ենք, որ Հայաստանի կողմից ռազմական բեռների փոխադրումը Ադրբեջանի տարածք, Հայաստանի զինված ուժերի անձնակազմի ուղարկումն ու ռոտացիան պետք է անհապաղ, մեկընդմիշտ դադարեցվի, հայկական զորքերը պետք է ամբողջությամբ դուրս բերվեն մեր երկրի տարածքից։ Հակառակ դեպքում ադրբեջանական կողմը հարկադրված կլինի, օգտագործելով բոլոր հնարավորությունները, ձեռնարկել վճռական, անհրաժեշտ միջոցներ՝ զինաթափելու և չեզոքացնելու անօրինական զինված կազմավորումները։ Հայաստանի նման գործողությունները դիտվում են որպես ռազմական ագրեսիայի շարունակություն», - ասված է հայտարարությունում:

 

Արցախը Հայաստանին և աշխարհին կապող միակ ճանապարհը՝ Լաչինի միջանցքը, իրենց բնապահպան ակտիվիստներ անվանող մի խումբ ադրբեջանցիների կողմից արգելափակված է արդեն մոտ երեք ամիս:

 

Հայաստանը բարձրագույն մակարդակով քանիցս հայտարարել է, որ Արցախից դուրս է բերել իր բոլոր զինծառայողներին, նաև առաջարկել է այդ փաստը ստուգելու համար միջազգային առաքելություն գործուղել տարածաշրջան:

 

Բաքուն նաև մեղադրում է Ռուսաստանի պաշտպանության նախարարությանը մարտի 5-ի զինված միջադեպի «փաստերը խեղաթյուրելու, իրականությանը չհամապատասխանող տեղեկություններ տարածելու մեջ». Ռուսաստանի ռազմական գերատեսչությունը երեկ հաստատել է, որ կիրակի առավոտյան Արցախում տեղի ունեցած միջադեպի ընթացքում առաջինը հրազեն կիրառել է ադրբեջանական կողմը։

 

 

Նոյյան տապան  -   Ի՞նչ է գրում մամուլը