Ստեփանակերտը պատրաստ է հանդիպման, բայց` ոչ Բաքվում և ոչ Ադրբեջանի օրակարգով
14-03-2023 10:41:38 | Հայաստան | Ի՞նչ է գրում մամուլը
Ազատություն. Պաշտոնական Ստեփանակերտը հայտարարում է, թե Ադրբեջանի ներկայացուցիչների հետ հանդիպումները կարող են տեղի ունենալ ռուս խաղաղապահների միջնորդությամբ և այնտեղ, որտեղ նախորդ հանդիպումն էր անցել: Մարտի 1֊ին կողմերը հանդիպել էին Իվանյանում տեղակայված ռուս խաղաղապահ զորակազմի շտաբում:
Ղարաբաղի արտգործնախարարությունը նաև պնդել է, թե օրակարգում պետք է լինեն հումանիտար, ենթակառուցվածքային, տեխնիկական հարցեր` «առանց դրանց անհարկի քաղաքականացման»:
Ադրբեջանի իշխանությունները, մինչդեռ, այսօր ավելի վաղ Արցախի ներկայացուցիչներին հրավիրել էին Բաքու՝ վերաինտեգրման շուրջ «հերթական քննարկման»:
Ղարաբաղի արտգործնախարարությունն արձագանքել է, թե հակամարտության համապարփակ կարգավորմանն ուղղված բանակցությունները պետք է տեղի ունենան միջազգայնորեն ճանաչված և հաստատված ձևաչափով՝ «կողմերի հավասար իրավունքների և ստանձնած պարտավորությունների կատարման միջազգային երաշխիքների առկայության պայմաններում»:
Ադրբեջանական հրավերին այսօր արձագանքել են նաև Ղարաբաղի խորհրդարանական ուժերը, պնդելով, թե «Արցախի շրջափակման, խաղաղ բնակչության ահաբեկման ու ոստիկաններին գնդակահարելու» պայմաններում ուղիղ երկխոսության մասին խոսակցությունները անընդունելի են համարում։
ՀԱՅԵՐԵՆ
Русский
English
Դաս. հայերեն
French
