ՆԱՏՕ-ի նախկին գլխավոր քարտուղարը այցելել է Լաչինի միջանցքի սկզբնամաս
14-03-2023 14:51:14 | Հայաստան | Ի՞նչ է գրում մամուլը
Sputnik. Գորիսում Անդերս Ֆոգ Ռասմուսենը հանդիպել է Լեռնային Ղարաբաղի քաղաքացիներին, ովքեր չեն կարողանում վերադառնալ։
ՆԱՏՕ-ի նախկին գլխավոր քարտուղար Անդերս Ֆոգ Ռասմուսենն այցելել է Լաչինի միջանցքի սկզբնամաս, որն արդեն երեք ամիս է՝ փակ է։ Այս մասին ֆեյսբուքյան իր էջում գրել է վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրեն Գոռ Ծառուկյանը։
«Նա Գորիսում նաև հանդիպել է Լեռնային Ղարաբաղի քաղաքացիներին, ովքեր չեն կարողանում վերադառնալ»,–գրել է ՊՈԱԿ–ի տնօրենը։
Նշենք, որ այս օրերին Հայաստանում են գտնվում ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը և նրա ղեկավարած «Ռասմուսեն Գլոբալ» կազմակերպության ներկայացուցիչները։ Նրանց ընդունել են ՀՀ վարչապետը, պաշտպանության նախարար Սուրեն Պապիկյանը և ՀՀ անվտանգության խորհրդի քարտուղար Արմեն Գրիգորյանը։
Փաշինյանը և Ռասմուսենը հանդիպել էին նաև փետրվարի 18-ին Մյունխենի անվտանգության համաժողովի շրջանակում։
Հիշեցնենք` 2022 թ. դեկտեմբերի 12-ից Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Դեկտեմբերի 13-ից ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
ՀԱՅԵՐԵՆ
Русский
English
Դաս. հայերեն
French
