Թևակոխել ենք խաղաղության պայմանագրի նախագծի քննարկման 4-րդ շրջափուլ. Փաշինյան
16-03-2023 13:20:59 | Հայաստան | Ի՞նչ է գրում մամուլը
Sputnik. Նիկոլ Փաշինյանը վստահեցրեց, որ Հայաստանը հավատարիմ է խաղաղության օրակարգին ու չի շեղվելու դրանից։
Հայաստանի Հանրապետությունը Ադրբեջանից ստացել է խաղաղության պայմանագրի վերաբերյալ նոր առաջարկներ: Այսպիսով թևակոխել ենք պայմանագրի նախագծի քննարկման 4-րդ շրջափուլ։ Այս մասին կառավարության նիստի ժամանակ ասաց ՀՀ վարչապետ Նիկոլ Փաշինյանը։
«Մենք կքննարկենք և առաջիկայում կներկայացնենք մեր դիտարկումները։ Հավատարիմ ենք ու չենք շեղվելու խաղաղության օրակարգից»,– ընդգծեց վարչապետը։
Միևնույն ժամանակ, նա միջազգային հանրության ուշադրությունը հրավիրեց այն փաստի վրա, որ ի հեճուկս 2020 թվականի նոյեմբերի 9-ի եռակողմ հայտարարության 8-րդ կետի` մինչև հիմա Ադրբեջանը չի վերադարձրել հայ գերիներին, պատանդներին և այլ պահվող անձանց։ Նա նաև հիշեցրեց, որ Ադրբեջանը շարունակում է օկուպացիայի տակ պահել 1994, 2021, 2022 թթ. ագրեսիայի հետևանքով Հայաստանի Հանրապետությունից բռնազավթած ինքնիշխան տարածքները։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարել էր Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին էր փոխանցել հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ էր ավելացրել և ուղարկել իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
ՀԱՅԵՐԵՆ
Русский
English
Դաս. հայերեն
French
