Ինձ անհասկանալի է ՌԴ-ի պահվածքը, Արևմուտքը պարտավորություններ չի ստանձել, տրամադրել է երկխոսության հարթակ. Խաչատրյան
19-05-2023 14:19:08 | Հայաստան | Ի՞նչ է գրում մամուլը
ՀՀ ազգային ժողովի իշխանական «Քաղաքացիական պայմանագիր» խմբակցության պատգավոր Վիգեն Խաչատրյանն ադրբեջանական ագրեսիայի, Լաչինի միջանցքը փակելու առնչությամբ անհասկանալի է համարում Ռուսաստանի պահվածքը, որը որոշակի պարտավորություններ ունի:
«Արմենպրես»-ի հաղորդմամբ՝ Խաչատրյանը նման դիրքորոշում հայտնեց ԱԺ-ում լրագրողների հետ ճեպազրույցում:
Նախ անդրադառնալով Հայաստանի ուղղությամբ Ադրբեջանի ագրեսիային՝ Խաչատրյանն ընդգծեց, որ կրակոցներն ակնհայտ սադրանքներ են և բոլոր պայմանավորվածությունները շրջանցելու գռեհիկ փորձ: Ըստ պատգամավորի՝ Ադրբեջանը շահագրգռված չէ խնդիրներին քաղաքակիրթ լուծումներ գտնելու:
Անդրադառնալով բրյուսելյան բանակցություններին, Արևմուտքից ակնկալիքների վերաբերյալ հարցին՝ պատգամավորն ասաց.
«Ի տարբերություն Արևմուտքի, Մոսկվայի պարագայում ունենք միջնորդ, որը ստանձնել է որոշակի պարտավորություններ:
Հետևաբար իմ սպասելիքները միջնորդից ավելի շատ են, քանի որ նա ունի պարտավորություն, հետևաբար նաև իրավունք՝ պահանջելու հարգել պարտավորությունները: Երբ, այսպես կոչված, «էկոակտիվիստները» փակել էին դեպի Արցախ ճանապարհը, Լավրովն ասաց, որ օրերի հարց է, միջանցքը կբացվի: Ես մտածում էի՝ հիմք ունի: Սակայն դրա փոխարեն անցակետ տեղադրվեց: Արևմուտքը պարտավորություններ չի ստանձնել, հարթակ է տրամադրում երկխոսության համար: Ինձ անհասկանալի է ՌԴ-ի պահվածքը, քանի որ մեր ժողովրդի, մեր պետության սպասելիքներն ավելի շատ են Ռուսաստանից»:
Ըստ նրա՝ Մոսկվայում նախատեսվող բանակցություններում կերևա՝ ՌԴ-ն վճռականություն կդրսևորի, թե ոչ:
Անդրադառնալով ՀԱՊԿ-ին՝ Խաչատրյանն ասաց, որ ՀՀ իշխանությունները շատ հստակ ասել են, որ մինչև օգնության, համագործակցության մասին խոսելը ՌԴ-ն պարտավոր է հայտարարել, որ Ադրբեջանը ագրեսիայի է դիմել, պետք է դուրս գա ՀՀ տարածքներից: «Քաղաքական գնահատական ենք պահանջում: Երբ այս մասով ՌԴ-ն լռում է, ինձ մոտ անհանգստություն է առաջանում, որ նրանց ներկայությունը նոր սադրանքների առիթ կարող է տալ: Մենք բազմաթիվ օրինակներ ունենք, որ ռուսական խաղաղապահ զորքերը հետ են քաշվել, տեղում անմիջապես հայտնվել են ադրբեջանցիները»,-ասաց Խաչատրյանը:
ՀԱՅԵՐԵՆ
Русский
English
Դաս. հայերեն
French
