Ադրբեջանի ԱԳ փոխնախարարն ԱՄՆ Կոնգրեսում հանդիպումներում հերքում է Լաչինի միջանցքի մասին «հայկական լոբբիի» հաղորդումները
22-05-2023 14:47:29 | Հայաստան | Ի՞նչ է գրում մամուլը
Ազատություն. Աշխատանքային այցով Վաշինգտոնում գտնվող Ադրբեջանի փոխարտգործնախարար Էլնուր Մամեդովը Միացյալ Նահանգների Կոնգրեսի Սենատի և Ներկայացուցիչների պալատի անդամների հետ հանդիպումներում պնդել է, թե հայկական լոբբին ստահոդ տեղեկություններ է տարածում Լաչինի միջանցքի շուրջ զարգացումների մասին:
«Հանդիպումների ընթացքում հայտարարվել է, որ Լաչինի սահմանային անցակետի ստեղծման հետ կապված ԱՄՆ-ում գործող հայկական ծայրահեղական կազմակերպությունները Կոնգրեսի անդամներին տրամադրում են իրականությանը չհամապատասխանող և չհիմնավորված տեղեկություններ», - ասվում է Ադրբեջանի ԱԳՆ մամլո ծառայության հաղորդագրությունում:
Գերատեսչության փոխանցմամբ՝ ադրբեջանցի պաշտոնյան նաև պնդել է, թե «Կոնգրեսի անդամների կողմից միակողմանի բանաձևերը չեն ծառայում Միացյալ Նահանգների ազգային շահերին և, բացի երկրների հարաբերություններից, վնասում են հայ-ադրբեջանական խաղաղ բանակցությունները»։
Լաչինի միջանցքի արգելափակումը, ապա այդ ճանապարհին Ադրբեջանի կողմից անցակետերի տեղադրումը դատապարտել է նաև պաշտոնական Վաշինգտոնը։ Դեռ ամիսներ առաջ էլ Արդարադատության միջազգային դատարանն Ադրբեջանին պարտավորեցրել էր ձեռնարկել բոլոր անհրաժեշտ միջոցները Լաչինի միջանցքով երկու ուղղություններով քաղաքացիների, տրանսպորտային միջոցների և ապրանքների անխափան տեղաշարժն ապահովելու համար։
Դեմոկրատ կոնգրեսական Ադամ Շիֆը ապրիլի վերջին Միացյալ Նահանգների Ներկայացուցիչների պալատ է ներկայացրել Արցախի անկախությունը ճանաչող բանաձևի նախագիծ:
ՀԱՅԵՐԵՆ
Русский
English
Դաս. հայերեն
French
