ԼՂ-ից տեղահանվածների՝ «40+10 հազար» աջակցության ծրագիրը երկարաձգվեց, ընդլայնվեց նաև շահառուների շրջանակը


ԼՂ-ից տեղահանվածների՝ «40+10 հազար» աջակցության ծրագիրը երկարաձգվեց, ընդլայնվեց նաև շահառուների շրջանակը

  • 28-03-2024 11:47:48   | Հայաստան  |  Մամլո հաղորդագրություն

 
Կառավարությունն առաջարկում է ԼՂ-ից բռնի տեղահանվածների՝ «40 հազար+10 հազար դրամի» ծրագրի հիման վրա ևս 9 ամսով շարունակել սոցիալական աջակցության միջոցառումը, այսինքն՝ կեցության և այլ ծախսերը հոգալու համար տրամադրվող աջակցությունը շարունակել 2024 թվականի ապրիլից մինչև դեկտեմբեր ներառյալ: Այդ մասին որոշման նախագիծը Կառավարության՝ մարտի 28-ի նիստին ներկայացրեց ԱՍՀ նախարար Նարեկ Մկրտչյանը:
 
Վճարումը կիրականացվի նույն տրամաբանությամբ, այն է՝ աջակցելով ընտանիքի յուրաքանչյուր անդամին՝ և՛  անչափահասներին, և՛ չափահասներին:
 
«Առաջարկվող նախագծով պահպանվում են «40 հազար +10 հազար» միջոցառման հիմնական պայմանները: Միաժամանակ մենք այս նոր նախագծով ընդլայնում ենք շահառուների շրջանակը` մասնավորապես որպես շահառու ենք դիտարկում 2020 թվականից հետո տեղահանված ընտանիքի անդամներին: Նաև այսօր նախագծով շահառու կդառնան բռնի տեղահանված ընտանիքներում նոր ծնված և ծնվող երեխաները կամ բոլոր այն՝ մինչև 18 տարեկան երեխաները, որոնց դրամական աջակցություն նշանակելու դիմում ներկայացրած ծնողը կամ խնամակալը կամ հոգաբարձուն միջոցառման շահառու է»,- ասաց նա:
 
նախարարը տեղեկացրեց, որ նախագծով նախատեսված միջոցառման շահառու չեն հանդիսանա ՀՀ-ում բնակարանային ծրագրի՝ 2022 թվականի 169-Լ որոշման շահառուները: Դա վերաբերում է բնակարան հավաստագրի իրավունք ունեցող՝ ԼՂ-ի առանձին շրջաններից տեղահանված ընտանիքներին:
 
«Նույն նախագծի շրջանակում նաև ժամկետների փոփոխություն ենք իրականացնում 100 հազարների և 50 հազարների միջոցառումներում՝ հնարավորություն տալով շուրջ 350 հոգու դառնալ 100 հազարների և մյուս միջոցառումների շահառու, եթե նրանց տեղահանված ճանաչելու ուղղությամբ ընթացիկ դիմումների հիման վրա մենք Միգրացիոն ծառայությունից կստանանք հաստատում տեղահանված լինելու փաստի մասով»,- մանրամասնեց նախարարը:
 
Նարեկ Մկրտչյանը նաև նշեց, որ նախատեսվում են որոշ իրավակարգավորումների հստակեցում և լավարկում: Դիմումներն ընդունվելու են ապրիլի 15-ից: «40 հազար+10 հազար» միջոցառման համակարգում դիմում ունեցող չափահասները կրկին դիմելու կարիք չեն ունենալու:
 
«Այս ծրագիրը մենք նախատեսում ենք իրականացնել մինչև տարվա վերջ: Տարվա վերջին տվյալ պահի դրությունը կուսումնասիրենք և կդիտարկենք ծրագրի շարունակման նպատակահարմարությունը: Դրան զուգահեռ՝ մենք այս երկարացումը դիտարկում ենք որպես հնարավորություն, որպեսզի կարողանան ԼՂ-ից բռնի տեղահանված մեր հայրենակիցները ավելի կայունանան, իրենց ծախսերը հոգալու հնարավորություն ունենան, միևնույն ժամանակ հնարավորություն ունենան ձեռք բերել աշխատանք»,- ասաց նա, ևս մեկ անգամ մանրամասնեց՝ փոփոխությունն այն է, որ ընդլայնվում է աջակցության շրջանակը, և 2020 թվականից հետո տեղահանված ընտանիքներն էլ են դառնում շահառու:
 
«Դրանց թիվը շուրջ 6000 է, ինչպես նաև տեղահանումից հետո մենք դեպքեր ունենք, երբ ընտանիքներում նոր երեխաներ են ծնվել, և հարց է առաջանում՝ երեխաները շահառո՞ւ են, թե՞ չէ»,- ասաց նա:
 
Հեղինակ`Լուսինե Մուրադյան
 
 
Նոյյան տապան  -   Մամլո հաղորդագրություն

https://s1.merlive.am/Noian_Tapan/embed.html?autoplay=false&play