Ադրբեջանը կասկածի տակ է դնում Հայաստանի տարածքային ամբողջականությունը. Ֆրանսիայի ԱԳ նախարար


Ադրբեջանը կասկածի տակ է դնում Հայաստանի տարածքային ամբողջականությունը. Ֆրանսիայի ԱԳ նախարար

  • 03-04-2024 10:33:34   | Հայաստան  |  Ի՞նչ է գրում մամուլը

 
Ազատություն. Ֆրանսիայի արտաքին գործերի նախարար Ստեֆան Սեժուրնեն և ԱՄՆ պետքարտուղար Էնթոնի Բլինքենը Փարիզում այսօրվա հանդիպմանը խոսել են նաև Հայաստանի տարածքային ամբողջականության մասին։
 
Հանդիպմանը հաջորդած ասուլիսի ընթացքում ֆրանսիացի պաշտոնյան հայտարարել է, որ Հայաստանի տարածքային ամբողջականությունն այսօր կասկածի տակ է դրվում Ադրբեջանի կողմից։ Նախարար Սեժուրնեն շեշտել է՝ մտահոգություն է հարուցում Ադրբեջանի հռետորաբանությունը, որը փորձում է կեղծ տեղեկատվություն տարածելով Հայաստանի վրա բարդել էսկալացիայի պատասխանատվությունը։
 
. Բլինքենը Ֆրանսիա է այցելել Բրյուսել մեկնելուց առաջ, որտեղ ապրիլի 5-ին նախատեսված է իր, Եվրահանձնաժողովի նախագահի և Հայաստանի վարչապետի եռակողմ հանդիպումը։
 
. Թեև տևական ժամանակ հայկական ու ադրբեջանական կողմերը հրադադարի խախտումների մասին տեղեկություններ չէին հաղորդել, Բաքուն վերջին օրերին պնդում էր, թե Հայաստանի բանակը սահմանի տարբեր հատվածներում անձնակազմի, զրահատեխնիկայի, հրետանային և կրակային այլ միջոցների «կուտակումներ և ակտիվ տեղաշարժեր է իրականացնում»:
 
. Հայաստանի պաշտպանության նախարարությունն ի պատասխան, արդեն երկու անգամ հերքել է Բաքվի այդ պնդումներն՝ ընդգծելով՝ դրանք իրականությանը չեն համապատասխանում։
 
. Նախորդ շաբաթ օրը վարչապետ Փաշինյանը ևս մեկ անգամ վերահաստատել է՝ Հայաստանն ընդհանրապես իր միջազգայնորեն ճանաչված, ինքնիշխան տարածքից դուրս որևէ հավակնություն չունի։
 
 
Նոյյան տապան  -   Ի՞նչ է գրում մամուլը