Հայաստանի եւ Վրաստանի խորհրդարանների այս երկու հանձնաժողովների միջեւ ձեւավորվել են համագործակցային ջերմ բարեկամական եւ գործընկերային հարաբերություններ. ասել է ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Սիսակ Գաբրիելյանը՝ հանձնաժողովների համատեղ նիստում ողջունելով Վրաստանի խորհրդարանի մշակույթի հանձնաժողովի նախագահ Գիորգի Գաբունյայի գլխավորած պատվիրակությանը: Նա նշել է, որ Հայաստանը կարեւորում է Վրաստանի հետ հարաբերությունների խորացումն ու ընդլայնումը բոլոր ոլորտներում, ինչի արտացոլումն է նաեւ 2024 թվականի հունվարին երկու երկրների միջեւ ստորագրված ռազմավարական գործընկերության վերաբերյալ համատեղ հռչակագիրը:

 

«Հայաստանն ու Վրաստանն ունեն օրինակելի հարաբերություններ: Մեր ազգերին միավորում են դարավոր բարեկամությունն ու եղբայրությունը»,- ասել է Գիորգի Գաբունյան: Նա նշել է, որ սա իր առաջին այցն է Հայաստան եւ շնորհակալություն է հայտնել ջերմ ընդունելության համար:

 

Սիսակ Գաբրիելյանը ներկայացրել է Հայաստանի եւ Ադրբեջանի միջեւ հարաբերությունների կարգավորման գործընթացը, ինչպես նաեւ ՀՀ կառավարության ,Խաղաղության խաչմերուկե նախագիծը: Նա շնորհակալություն է հայտնել վրացական կողմին՝ այդ գործընթացին աջակցելու համար:

 

Կողմերն ընդգծել են, որ զգալիորեն ակտիվացել են երկկողմ բարձր մակարդակի շփումներն ու համագործակցությունը: Այս համատեքստում կարեւորվել է նաեւ միջազգային հարթակներում համագործակցային գործունեության ծավալումը: Անդրադարձ է կատարվել տարածաշրջանային անվտանգությանը եւ երկարատեւ խաղաղության հաստատմանը վերաբերող հարցերի:

 

Քննարկման ընթացքում կարեւորվել է երկու երկրների միջեւ մշակութային համագործակցությունը: Նշվել է, որ մշակույթի օրերի փոխադարձ անցկացումը մեծապես նպաստում է մշակութային երկխոսության ակտիվացմանն ու գործընկերության նոր մակարդակի բարձրացմանը:

 

«Վրաստանը միշտ աջակցում է հայկական մշակութային օջախների գործունեությանն ու զարգացմանը»,- նշել է Գիորգի Գաբունյան՝ տեղեկացնելով, որ գրեթե ավարտվել են Թբիլիսիի Պետրոս Ադամյանի անվան պետական հայկական դրամատիկական թատրոնի շենքի վերանորոգման աշխատանքները:

 

Գոհունակությամբ է նշվել, որ կայուն գործընկերություն է ձեւավորվել Հակոբ Պարոնյանի անվան երաժշտական կոմեդիայի պետական թատրոնի եւ Ռուսթավելիի անվան թատրոնի միջեւ. իրականացվում են համատեղ բեմադրություններ, հյուրախաղեր:

 

Կարեւորելով Հայաստանի եւ Վրաստանի թանգարանների միջեւ փոխգործակցության անհրաժեշտությունը՝ նշվել է, որ Ջավախքի Գանձա գյուղում Վահան Տերյանի 140-ամյակին նվիրված միջոցառումների շրջանակներում տեղի է ունենալու տուն-թանգարանի վերաբացման հանդիսավոր արարողություն:

 

Անդրադարձ է կատարվել մշակութային համագործակցության զարգացմանը վերաբերող օրակարգային մի շարք հարցերի:

 

Հայաստանի ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի ու Վրաստանի խորհրդարանի մշակույթի հանձնաժողովի համատեղ նիստը տեղի է ունեցել հունիսի 19-ին, որին մասնակցել են ՀՀ ԱԺ «Քաղաքացիական պայմանագիր» խմբակցության պատգամավորներ Թագուհի Ղազարյանը, Ջուլիետա Ազարյանը, Նարեկ Բաբայանը, ՀՀ ԱԺ «Հայաստան» խմբակցության պատգամավորներ Արմինե Խերանյանը եւ Լիլիթ Գալստյանը:

 

Նոյյան տապան  -   Մամլո հաղորդագրություն