Սրբազանների կալանավորումն ապօրինի է. Ռուսաստանի և Նոր Նախիջևանի թեմի հոգևորականներ
09-12-2025 12:42:52 | Հայաստան | Ի՞նչ է գրում մամուլը
sputnik. Հոգևորականները նշել են, որ անմնացորդ հավատարիմ են Մայր աթոռ Սուրբ Էջմիածնին և ազգընտիր հայրապետ Գարեգին Բ Ամենայն հայոց Կաթողիկոսին:
Հայ առաքելական սուրբ եկեղեցու Ռուսաստանի և Նոր Նախիջևանի թեմի հոգևոր սպասավորները դատապարտել են ՀՀ իշխանությունների հակաեկեղեցական քայլերը։ Նրանք հայտարարություն են տարածել` դատապարտելով 4 սրբազանների կալանավորումը։
«Մենք` Հայ առաքելական սուրբ եկեղեցու Ռուսաստանի և Նոր Նախիջևանի թեմի հոգևոր սպասավորներս, ծուխերի ատենապետերս և ներկայացուցիչներս՝ Վլադիվոստոկից մինչև Կալինինգրադ, Միջին Ասիայից մինչև Բելառուս և Մոլդովա, խորապես մտահոգված ենք և խստորեն դատապարտում ենք Հայաստանի Հանրապետության իշխանությունների որդեգրած հակասահմանադրական, հակաեկեղեցական, աստվածամերժ գործողությունները, հոգևորականների և եկեղեցասեր զավակների մտացածին մեղադրանքներով ապօրինի կալանավորումները: Իշխանությունների այս գործողությունները քայքայում են ազգային միասնությունը, երկպառակություն և թշնամանք են սերմանում հայ ժողովրդի մեջ»,– ասված է հայտարարությունում։
Հոգևորականները նշել են, որ անմնացորդ հավատարիմ են Մայր աթոռ Սուրբ Էջմիածնին և ազգընտիր հայրապետ Ն.Ս.Օ.Տ.Տ. Գարեգին Բ Ամենայն հայոց կաթողիկոսին:
Հիշեցնենք, որ նոյեմբերի 30–ին Ռուսաստանի և Նոր Նախիջևանի Հայոց թեմի հոգևոր սպասավորները հայտարարություն էին տարածել` շեշտելով, որ Վեհափառի անունը պատարագին չհնչեցնելը շեղում է և Սուրբ պատարագի խորհրդի աղճատում։
Տևական ժամանակ է` ՀՀ իշխանությունը արշավ է սկսել եկեղեցու ու հատկապես կաթողիկոսի դեմ։ Ճաղերի հետևում են «Սրբազան պայքար» շարժման առաջնորդ Բագրատ արքեպիսկոպոս Գալստանյանը, Շիրակի թեմի առաջնորդ Միքայել արքեպիսկոպոս Աջապահյանը, Արագածոտնի թեմի առաջնորդ Մկրտիչ սրբազանը, Մայր աթոռի դիվանապետ Արշակ արքեպիսկոպոս Խաչատրյանը։
ՀԱՅԵՐԵՆ
Русский
English
Դաս. հայերեն
French
