2011 Թ.-ԻՆ ՀԱՅԱՍՏԱՆՆ ԱՄԲՈՂՋՈՒԹՅԱՄԲ ԿԱՊԱՀՈՎՎԻ ՀԱՑԱՀԱՏԻԿԱՅԻՆ
ՄՇԱԿԱԲՈՒՅՍԵՐԻ ԲԱՐՁՐՈՐԱԿ ՍԵՐՄԱՑՈՒՆԵՐՈՎ
08-11-2007 21:30:00 | Հայաստան | Տնտեսություն
ԵՐԵՎԱՆ, 8 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայաստանը բարձրորակ
սերմացուներով ապահովված չէ, եւ Գյուղատնտեսության նախարարությունն
այդ ուղղությամբ աշխատանքներ է իրականացնում: Այս մասին նոյեմբերի
8-ի ասուլիսում հայտնեց նախարարության Բուսաբուծության զարգացման
եւ բույսերի պաշտպանության վարչության պետ Գառնիկ Պետրոսյանը: Ըստ
նրա, հանրապետությունում սերմնաբուծությունը հիմնականում
իրականացվում է մասնավոր տնտեսվարող սուբյեկտների կողմից, որոնք
լուրջ աջակցության կարիք ունեն: Այդ նպատակով նախարարությունը
մշակել է «Սերմաբուծության 2007-2011թթ.-երի զարգացման ծրագիր»,
որն արժանացել է կառավարության հավանությանը:
Գ.Պողոսյանը հայտնեց, որ այս տարի նախահիմնային եւ հիմնային
սերմերի արտադրությամբ զբաղվող տնտեսությունները ստացել են մոտ 36
մլն դրամի (մոտ 107 հազար ԱՄՆ դոլար) չափով լրավճարներ: 2008թ.-ին
այդ ծավալը կավելանա, եւ ծրագրի ընդհանուր արժեքը տարեկան կկազմի
մոտ 105 մլն դրամ: Ծրագրի իրականացման ավարտին` 2011թ.-ին,
հանրապետությունն ամբողջությամբ կապահովվի հացահատիկային
մշակաբույսերի բարձրորակ սերմացուներով:
Նշվեց նաեւ, որ նույն ծրագրի շրջանակներում այս տարի ներկրվել
է 60 տոննա աշնանացան ցորենի «սուպեր էլիտային» եւ 15 տոննա
գարնանացան գարու սերմացու: