2006 Թ.-Ի ԱՌԱՋԻՆ ԵՌԱՄՍՅԱԿՈՒՄ ԿԱՎԱՏՈՒԹՅԱՄԲ ԵՎ ՄԱՐԴԿԱՆՑ
ԱՌԵՎՏՐԻ ՓԱՍՏԵՐՈՎ ՀԱՅԱՍՏԱՆՈՒՄ ՀԱՐՈՒՑՎԵԼ Է 5 ՔՐԵԱԿԱՆ ԳՈՐԾ
14-06-2006 17:15:00 | Հայաստան | Հասարակություն
ԵՐԵՎԱՆ, 14 ՀՈՒՆԻՍԻ, ՆՈՅՅԱՆ ՏԱՊԱՆ: Միայն 2006թ. առաջին
եռամսյակում կավատությամբ եւ մարդկանց առեւտրի փաստերով
Հայաստանում հարուցվել է 5 քրեական գործ, որոնց նյութերի համաձայն
սեռական շահագործման են ենթարկվել 57 անձինք, որոնցից 53-ը ՀՀ-ի եւ
4-ը Ուկրաինայի քաղաքացիներ են: Այս մասին լրագրողների հետ հունիսի
14-ի հանդիպմանը տեղեկացրեց ՀՀ Ոստիկանության Կազմակերպված
հանցավորության դեմ պայքարի գլխավոր վարչության պետի տեղակալ,
Թմրամիջոցների ապօրինի շրջանառության եւ թրաֆիկինգի դեմ պայքարի
վարչության պետ, ոստիկանության գնդապետ Կարեն Բաբակեխյանը: Նշված
անձանցից 10-ը սեռական շահագործման են ենթարկվել ՀՀ-ում, իսկ 47-ը
արտերկրում (45-ը` Արաբական Միացյալ Էմիրություններում, 2-ը`
Թուրքիայում): Ըստ Կ.Բաբակեխյանի, մոտ 2 ամիս առաջ ՌԴ իրավապահ
մարմինների հետ համատեղ գործողությունների շնորհիվ ՀՀ իրավապահները
կանխել են Մոսկվայով 4 հայ կանանց Արաբական Միացյալ Էմիրություններ
տեղափոխելու փորձը:
Նշվեց, որ թրաֆիկինգի փաստերով հետախուզվում են Արաբական
Միացյալ Էմիրությունում գտնվող 13 ՀՀ քաղաքացիներ: Կ.Բաբակեխյանը
հայտնեց, որ հայկական կողմը մտադիր է դիմել ԱՄԷ-ի իրավապահ
մարմիններին` հետախուզվողներին Հայաստան վերադարձնելու նպատակով:
Կ.Բաբակեխյանը բնակչությանը կոչ արեց զգոն լինել եւ
աշխատանքային թրաֆիկինգի զոհ չդառնալ: Նման գործունեություն
իրականացնող գործակալությունները իրենց զոհերի փաստաթղթերի
ձեւակերպումը հիմնականում իրականացնում են արտերկրում, ինչը
կեղծիքների հնարավորություն է տալիս: Ոստիկանությունը դիմել է
կառավարությանը` սահմանել աշխատանքի տեղավորման սունկի պես օրի-օրի
ավելացող գործակալությունների, ինչպես նաեւ գիշերային զվարճանքի
հաստատությունների լիցենզավորման կարգը: Ոստիկանությունը առաջարկել
է նաեւ գիշերային զվարճանքի հաստատությունները դուրս բերել Երեւանի
տարածքից, ինչպես արվեց խաղատների պարագայում:
Ի պատասխան թղթակիցներից մեկի հարցի Կ.Բաբակեխյանը նշեց, որ
Երեւանում մարզերից եկած մարմնավաճառների թիվը շուրջ 1000 է,
մարմնավաճառների 3-4 տոկոսը 15-17 տարեկան անչափահասներ են: Ըստ
նրա, արտագնա մարմնավաճառությամբ զբաղվող անչափահաս
մարմնավաճառների թիվը հնարավոր չէ ճշտել, քանի որ նրանց
անձնագրային տվյալները կեղծված են: