Հունվարի 24-ին ժամը 10:00-ին «Արմենիա Մարիոթ» հյուրանոցի «Տիգրան Մեծ» կոնֆերանս դահլիճում տեղի կունենա ԵՊԲՀ համակարգմամբ Հայաստանում երբևէ շահած առաջին Հորիզոն 2020 թվիննինգ COBRAIN  ծրագրի մեկնարկային գիտաժողովը:

 

ՀՀ փոխվարչապետ Տիգրան Ավինյանի, ՀՀ-ում Եվրամիության պատվիրակության ղեկավարի, Գերմանիայի Դաշնային Հանրապետության արտակարգ և լիազոր դեսպան Միխայել Բանցհաֆի, Շվեդիայի խորհրդական-դեսպանորդ, գործերի ժամանակավոր հավատարմատար Բիրյեր Կարլսոնի, համագործակցող համալսարանների ներկայացուցիչների,  ինչպես նաև Եվրահանձնաժողովի ներկայացուցչի և այլ հյուրերի հետ միասին կարձանագրվի ծրագրի պաշտոնական մեկնարկն ու կդրվի ծրագրի հաջող իրականացման ամուր հիմնաքարը: «Քրոնիկ նեյրոդեգեներատիվ հիվանդությունների տրանսլյացիոն հետազոտություն¬նե¬րի կենտրոն Հայաստանում. Նեյրոգիտություն՝ հանուն ուղեղի առողջ ծերացման - COBRAIN» ծրագրի հիմնական խնդիրն է ուղեղի հետազոտությունների խթանման միջոցով զարգացնել համալսարանի հետազոտական և նորարարական կարողությունները՝ շեշտը դնելով ուղեղի հիվանդությունների բուժման բջջային և դեղորայքային նյարդապաշտան մեխանիզմների վրա: Սերտորեն համագործակցելով Թյուբինգենի (EKUT, Գերմանիա), Բոխումի (RUB, Գերմանիա) և Լունդի (ULUND, Շվեդիա) համալսարանների հետ՝ նախատեսվում է հաստատել նեյրոգիտության հետազոտությունների կառուցվածքը, կատարելագործել երիտասարդ հետազոտողների հմտությունները, ընդլայնել հետազոտական կարիերայի հնարավորությունները, զարգացնել համալսարանի նորարարական կարողությունները, ինչի արդյունքում համալսարանն ավելի ներկայանալի կլինի գիտական հանրության առջև:

Նախագիծը հիմք կհանդիսանա Հայաստանում «Ուղեղ» նախաձեռնության թողարկման և Ուղեղի հետազոտության գերազանցության կենտրոնի համար համապատասխան աշխատակազմի ու ենթակառուցվածքի ձևավորման համար։ 

 

 

 

 

  -