Ստեփան Աղաջանյանը

ծնվել է 1863 թվականի դեկտեմբերի 28-ին Շուշիում, դերձակի ընտանիքում: Սովորել է Շուշիի թեմական դպրոցում (1872-1881) եւ ռուսական ռեալական ուսումնարանում (1881-1884): 1884 թվականին մեկնում է Բաքու, 1886 թվականին` Ֆրանսիա:
Հիմնավոր նկարչական կրթությունը ստացել է 1886-1890 թվականներին Մարսելի նկարչական ստուդիայում, ապա Փարիզի Ժյուլիան ակադեմիայում` 1897-1900 թվականներին պրոֆեսորներ Բ. Կոնստանի եւ Ժ. Պ. Լորանսի արվեստանոցում:

Ստեփան Աղաջանյանը 1900 թվականին վերադարցել է Շուշի, 1902-1904 թվականներին աշխատել է Բաքվում, ապա տեղափոխվել Դոնի Ռոստով, ուր մինչեւ 1921 թվականը ստեղծագործել եւ նկարչություն է դասավանդել հանրակրթական դպրոցներում ու Պետական նկարչական ստուդիայում:

Ստեփան Աղաջանյանը 1921 թվականին վերադառնում է Հայաստան: 1922-1929 թվականներին պաշտոնավարել է գեղարվեստա-արդյունաբերական տեխնիկումում (այժմ` Երեւանի Փ. Թերլենեզյանի անվան գեղարվեստի ուսումնարան) իբրեւ գեղանկարչության դասատու: 1938 թվականին արժանանում է Խորհրդային Միության ժողովրդական նկարիչ կոչմանը:
Մահացել է 1940 թվականի դեկտեմբերի 13-ին:

 

---