Որոշուած է գաղտնի պահել Մուամմէր Քատտաֆիի գերեզմանին վայրը
27-10-2011 15:13:32 | | Ի՞նչ է գրում սփյուռքի մամուլը
«Նոր Յառաջ»
Հոկտեմբեր 27
Լիպիոյ բռնակալին սպանութենէն ի վեր՝ անցեալ Հինգշաբթի, երկիրը իր ապագայի հարցը մէկդի դրած, կը զբաղէր միակ հարցով մը՝ ո՞ւր պէտք է թաղել Մուամմէր Քատտաֆին: Այնպիսի լուծում մը պէտք էր գտնել, որ անոր գերեզմանը ապագային ուխտատեղիի չվերածուի: Երեքշաբթի, լուծում մը գտնուած էր, որ Փոխանցման Ազգային Խորհուրդի անդամներուն մեծ մասին ալ փափաքածն էր: Քատտաֆի վերջապէս թաղուած է եւ որոշուած է գաղտնի պահել անոր գերեզմանին վայրը:
Ճի՞շդ ընտրութիւն կատարած է Արեւմուտքը
Կայ նաեւ այլ հարց մը: Դեռ բնաւ յստակ չէ, թէ Լիպիոյ նախկին ղեկավարը ճշգրիտ ի՞նչ պայմաններու մէջ մահացած է: Անոր մահը պատահած է դաշնակցային ուժերու յարձակմա՞ն ընթացքին, թէ բռնակալը վայրագօրէն սպաննուած է ընդդիմադիր ուժերուն կողմէ՝ ինչպէս լուրջ կասկածներ կան այդ ուղղութեամբ: Եթէ այս երկրորդ վարկածը հաստատուի, այդ պարագային՝ արեւմտեան դաշնակիցները կրնան երկա՜ր խորհրդածել, թէ որո՛ւ վստահեցան այդ երկրին մէջ ժողովրդավար կարգեր հաստատելու գործը: