ՀՀ մարդու իրաւունքների պաշտպան Կարէն Անդրէասեանն օրէնսդրական փոփոխութեան երկու առաջարկ է ուղղարկել ՀՀ վարչապետ Տիգրան Սարգսեանին, ՀՀ Ազգային ժողովի «Ժառանգութիւն» խմբակցութեան ղեկավար Ստեփան սաֆարեանին, «Հայ Յեղափոխական Դաշնակցութիւն» խմբակցութեան ղեկավար Վահան յովհաննիսեանին, «Օրինաց երկիր» խմբակցութեան ղեկավար Հեղինէ Բիշարեանին, «Բարգաւաճ Հայաստան» խմբակցութեան ղեկավար Գագիկ Ծառուկեանին եւ «Հայաստանի Հանրապետական կ'ուսակցութիւն» խմբակցութեան ղեկավար Գալուստ Սահակեանին: ՀՀ մարդու իրաւունքների պաշտպանին ուղղուած բողոքները վկայում են այն մասին, որ բժշկասոցիալական փորձաքննութեան արդիւնքում հաշմանդամութիւն ունեցող մարդիկ համապատասխան յանձնաժողովի կողմից չեն ճանաչւում հաշմանդամ: Որոշ դէպքերում էլ օրէնքով նախատեսուած հերթական փորձաքննութեան ընթացքում հաշմանդամութեան խումբ ունեցող մարդկանց զրկում են խմբից կամ փոխում դէպի դրական խումբ, երբ նրանց առողջական վիճակը ոչ թէ բարելաւուել է, այլ հակառակը` վատթարացել: Ունենալով լուրջ առողջական խնդիրներ եւ դրանք վկայող բժշկական եզրակացութիւններ` մարդը յաճախ չի ճանաչւում հաշմանդամ այն պատճառաբանութեամբ, որ իր ունեցած հիւանդութիւնը, վնասուածքը կամ խեղումը չեն առաջացնում հաշմանդամութեան սահմանման համար անհրաժեշտ կենսագործունէութեան սահմանափակում: Դրա պատճառը օրէնքով նախատեսուած հաշմանդամութեան սահմանման չափանիշների անորոշութիւնն է, ինչը գնահատման հայեցողութեան բաւականին լայն շրջանակ է նախատեսում բժշկասոցիալական փորձաքննութեան յանձնաժողովների համար, արդիւնքում` փորձաքննութիւնները որոշ դէպքերում իրականացւում են ոչ օբյեկտիւ ու կամայական: Հասարակութեան եւ պետութեան կարիքների համար օտարուած գօտիներում գտնուող գոյքի սեփականատէրերի բողոքները յաճախ վերաբերում են փոխհատուցման խնդիրներին եւ պետութեան կողմից կառուցապատողների նկատմամբ պատշաճ հսկողութեան բացակայութեանը: Օրէնքով նախատեսւում է, որ օտարուող սեփականութեան դիմաց սեփականատիրոջը վճարւում է համարժէք փոխհատուցում, այն է` օտարուող գոյքի շուկայական արժէքից տասնհինգ տոկոս աւելի գումար: Այս դէպքում հաշուի չի առնւում այն հանգամանքը, որ օտարումը կատարւում է սեփականատիրոջ կամքին հակառակ, հետեւաբար օտարուող սեփականութեան փոխհատուցման չափը որոշելիս շուկայական արժէքին զուգահեռ անհրաժեշտ է կիրառել նաեւ այլ չափանիշներ, օրինակ` սեփականատիրոջ համար նոյնանման պայմաններ այլ վայրում ապահովելու հնարաւորութիւնը: Մտահոգիչ է նաեւ այն հանգամանքը, որ պետութիւնը սահմանափակւում է միայն տարածքի նկատմամբ բացառիկ` գերակայ հանրային շահ ճանաչելով, իսկ օտարուած գօտիներում գտնուող գոյքի սեփականատէրերի նկատմամբ պարտաւորութիւնների կատարումը լիովին թողնուած է օտարուող սեփականութիւնը ձեռք բերող կազմակերպութիւններին, որոնց գործունէութեան համար պետութիւնը որեւէ պատասխանատուութիւն չի կրում եւ որեւէ կերպ չի վերահսկում յետագայ գործընթացը: Ըստ ՀՀ մարդու իրաւունքների պաշտպանի Տեղեկատուութեան եւ հասարակայնութեան հետ կապերի բանի մամլոյ հաղորդագրութեան, պաշտպանը ներկայացրել է վերոյիշեալ խնդիրների լուծման իր տարբերակները եւ առաջարկել է հանդէս գալ օրէնսդրական փոփոխութիւններ կատարելու նախաձեռնութեամբ: Պաշտպանի գրութիւնների ամբողջական տեքստը ներկայացուած է http://pashtpan.am/main/am/0/27/2533 www.pashtpan.am կայքում:

---