«ԱԼԻՔ» - Հասարակութեան համայնքային հատուկենտ անհատներից լսում ենք տեսակէտ, թէ «Ալիք»-ի 80-ամեակին նւիրւած միջոցառումների շարանը արդէն իսկ երկարել է... սա՝ իմիջիայլոց, քանզի երէկ Հ. Մ. «Սիփան» միութեան նորակառոյց սրահում «Ալիք»-ի 80-ամեակին նւիրւած տօնախմբութիւնը, որը նախաձեռնել էին Հ. Մ. «Սիփան» միութիւնը, Փերիոյ Կրթասիրաց եւ «Հայ կին» միութեան կից «Արմենուհի» միութիւնները, հասարակութեան կողմից իր ընդառաջմամբ եկաւ ապացուցելու հակառակը: Այստեղ անպայմանօրէն ցանկանում ենք ընդգծել Հ. Մ. «Սիփան» միութեան Սկաուտական բաժանմունքի աշխոյժ օժանդակութիւնը՝ միջոցառումն իրականութիւն դարձնելու գործում ու նաեւ այն իրողութիւնը, որ սրահն ինքնին յոբելեարին յատուկ բոյրով էր ողողւած. պատերին «Ալիք»-ի տարբեր ժամանակաշրջանների էջերն ու առաջնորդող կարգախօսներն էին փակցւած եւ որ աչք էր շոյում՝ օրւայ յայտագիրն էր, որը «Ալիք»-ի առաջին էջի ճակատային տեսքն ունէր: Ժողովրդական մեծ տօնախմբութեան վերածւած միջոցառմանը հանդէս եկաւ Հ. Մ. «Սիփան» միութեան «Կոմիտաս» երգչախումբը՝ Տիգրան Սուքիասեանի ղեկավարութեամբ, որն էլ եւ «Ալիք»-ի 80-ամեակին նւիրւած օրհներգով կատարեց հանդիսութեան բացումը: Ողջոյնի խօսքերով ելոյթ ունեցան՝ Հ. Մ. «Սիփան» միութեան հիմնադիրներից եւ թերթիս նախկին խմբագիրներից Նորայր Էլսայեանը եւ թերթիս նախկին աշխատակից Տիգրան Դաւթեանը: Դէպի Հայրենիք կոչին անսալու իրենց իսկ ընթացքով օրինակ հանդիսացած անհատներ, որոնք երէկ ներկայ բազմութեան մէջ էին, ժամանել էին Հայաստանից. ներկայ էին եւ իրենց ներկայութեամբ ոգեւորում էին՝ ազգայինհասարակական ու կրթական վաստակաւոր գործիչ Նորայր Շահնազարեան, Սերժիկ Ամիրխանեան եւ էլի ուրիշներ: Դահլիճում ներկայ էին նաեւ՝ Իսլ. խորհրդարանում հիւսիսային իրանահայութեան պատգամաւոր Գէորգ Վարդանեանը, «Ալիք» հաստատութեան ներկայացուցիչ Գեւիկ Մկրտչեանը, Թ. Հ. Թ. Պատգամաւորական ժողովի ատենապետ Գէորգ Աբուլեանը եւ 80-ամեակը նշանաւորող Գործադիր յանձնախըմբի ներկայացուցիչները: Այստեղ տեղին է կարեւորութեամբ նշել, որ միջոցառմանը հրաւիրւած էին Սասուն քաղաքամասի հասարակական, մշակութային, կրթական, եկեղեցական մարմինները եւ միաւորները, որոնք իրենց շնորհաւորանքը ներկայութիւնից զատ՝ դրսեւորել էին նաեւ ծաղկեկողովներով: Երեկոն իրենց ելոյթներով իսկական տօն դարձրեցին՝ Հ. Մ. «Սիփան» միութեան մանկական երգչախումբը՝ ղեկավարութեամբ Էմինէ Մելքոմի, նոյն միութեան «Գարուն» պարախումբը՝ ղեկավարութեամբ Կարինէ Պետրոսեանի եւ Աշոտ Խաչատրեանի, ասմունքեցին «Նոր դար» ասմունքի խմբի անդամներ՝ Զօրիկ Շահբազեանը եւ Արգին Տէր-Մկրտչեանը (խմբի ղեկավար՝ Անժէլ Մինասեան): «Արմենուհի» միութիւնը բացառիկ ներդրում էր ունեցել միջոցառման կայացման մէջ՝ իրեն վերապահելով ընդունելութեան ողջ նախաձեռնութիւնն ու իրականացումը: Եթէ չլինէր ժամանակի սղութիւնը, կարելի էր ենթադրել, որ երեկոն իր ջերմութեամբ ու տօնական ոգով դեռ երկար կը շարունակւէր, երեկոյ, որն իր ողջ գոյութեամբ ներծծւած էր ազգային ոգու բառ ու բանով՝ աւելիով շեշտելով «Ալիք»-ի ազգային դիմագիծը, որով էլ ոգեշնչւած՝ թերթիս խմբագիր Դերենիկ Մելիքեանը միջոցառման աւարտին իր շնորհակալական խօսքում երախտագիտութեան յատուկ խօսք յղեց երեկոն տօնախմբութեան վերածած մասնակիցներին, կազմակերպիչ նախաձեռնողներին եւ ներկաներին, ովքեր իրենց իսկ ներկայութեամբ ու մասնակցութեամբ մէկ անգամ եւս եկան ապացուցելու «Ալիք»-ի բնութագիր հանդիսացող ժողովրդականութիւնը ու վկայեցին ե՛ւ իրենց ներկայութեամբ, ե՛ւ գործով: «ԱԼԻՔ» օրաթերթ 8 նոյեմբերի 2011 թ.

---