Բակոյ Սահակեանը կարեւորել է Ֆրանսիայի դերակատարութիւնը ադրբեջանա-ղարաբաղեան հակամարտութեան կարգաւորման գործում
09-03-2011 17:29:47 | | Քաղաքական
Արցախի Հանրապետութեան Նախագահ Բակոյ Սահակեանը մարտի 9-ին այցելել է Ֆրանսիայի Հանրապետութեան Սենատ եւ հանդիպել նրա մի խումբ անդամների հետ:
Բակոյ Սահակեանը կարեւորել է Ֆրանսիայի դերակատարութիւնը ադրբեջանա-ղարաբաղեան հակամարտութեան կարգաւորման եւ տարածաշրջանային խաղաղութեան ու կայունութեան պահպանման գործում` միաժամանակ ընդգծելով Արցախի շահագրգռուածութիւնը Ֆրանսիայի, մասնաւորապէս, նրա օրէնսդիր թեւի հետ համագործակցութեան մէջ:
Նախագահը ներկայացրել է ղարաբաղեան հիմնախնդրի, Արցախի սոցիալ-տնտեսական զարգացման ներկայ վիճակը եւ արտաքին քաղաքականութեան հիմնական ուղղութիւնները:
Երկուստէք նշուել է նման հանդիպումների կարեւորութիւնը երկկողմ յարաբերութիւնների զարգացման տեսանկիւնից:
Հանդիպմանը ներկայ էին Ֆրանսիայում Հայաստանի Հանրապետութեան արտակարգ եւ լիազօր դեսպան Վիգէն Չիթեչեանը, Ֆրանսիայում ԼՂՀ մշտական ներկայացուցիչ Յովհաննէս Գէորգեանը, պաշտօնատար այլ անձինք:
ԱՐՑԱԽԻ ՀԱՆՐԱՊԵՏՈՒԹԵԱՆ ՆԱԽԱԳԱՀԻ ԱՇԽԱՏԱԿԱԶՄԻ
ՏԵՂԵԿԱՏՈՒՈՒԹԵԱՆ ԳԼԽԱՒՈՐ ՎԱՐՉՈՒԹԻՒՆ