Մայիսի 18-ին տեղի ունեցաւ ՀՀ տարածքային կառավարման նախարարութեան արդիականացուած կայքի` www.mta.gov.am շնորհանդէսը: Տարածքային կառավարման նախարարի առաջին տեղակալ Վաչէ Տէրտէրեանը նշեց, որ կայքը հանրութեանն ապահովում է նախարարութեան, մարզպետարանների գործունէութեան եւ համայնքային բիւջէների կատարողականի վերաբերեալ համապարփակ տեղեկատուութեամբ: Կայքն ունի նոր տեսք, հնարաւորինս հաշուի են առնուել ժամանակակից տեխնիկական լուծումները, որոնք թոյլ են տալիս մեծ ծաւալով տեղեկատուութիւնն առաւել մատչելի դարձնել հանրութեանը: ԱՄՆ ՄԶԳ առաքելութեան տնօրէնի տեղակալ Ջոն Սէոնգը նշեց, որ նոր կայքը նախարարութեան էլեկտրօնային կառավարման եւ հանրային իրազեկման գործընթացում առաջընթաց է, որը համապատասխանում է տեղեկատուութեան ազատութեան միջազգային չափանիշներին: “ինֆորմացիայի ազատութեան կենտրոն” Հկ-ի նախագահ Շուշան Դոյդոյեանը կարեւորեց այն փաստը, որ կայքում հրապարակուած են պարտադիր հրապարակման ենթակայ բոլոր տեղեկութիւնները, որոնք հանրային կարեւորութիւն ունեն: Կայքում օգտագործողները կարող են ծանօթանալ տեղեկատուութեան ազատութեան օրէնսդրութեանը եւ առցանց հետեւել իրենց ինֆորմացիոն ազատութեան հարցումների ընթացքին: ՏԿՆ կայքի միջոցով հնարաւոր է անցում կատարել մարզպետարանների տեղեկատուական պորտալներ, որոնց բարեփոխման աշխատանքները դեռեւս ընթացքի մէջ են եւ նախատեսւում է, որ կ'աւարտուեն 2011թ. սեպտեմբերին: ՏԿՆ կայքն արդիականացուել է “ինֆորմացիայի ազատութեան կենտրոն” Հկ-ի կողմից իրականացուող “տեղեկատուութեան մատչելիութիւնը որպէս համայնքային մասնակցութեան միջոց” ծրագրի շրջանակում, ԱՄՆ ՄԶԳ ֆինանսական աջակցութեամբ:

---