ԵՐԵՒԱՆ, 14 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Փետրուարի 15-ին ՀՀ աշխատանքի եւ սոցիալական հարցերի նախարարութիւնը նախատեսում է կառավարութիւն ուղարկել 2010թ.-ի հոկտեմբերի 27-ին Ազգային ժողովի կողմից ընդունուած եւ դեկտեմբերից ուժի մէջ մտած «Ժամանակաւոր անաշխատունակութեան նպաստների մասին» օրէնքում փոփոխութիւններ եւ լրացումներ կատարելու մասին օրինագիծը: Այն կառավարութեան հաւանութեանն արժանանալու դէպքում կ'ուղարկուի ԱԺ: Այս մասին փետրուարի 14-ին նախարարութիւնում կայացած օրինագծի հանրային քննարկման ժամանակ տեղեկացրեց նախարար Արթուր Գրիգորեանը` շնորհակալութիւն յայտնելով մի շարք հասարակական կազմակերպութիւններին եւ ակտիւ անհատներին, որոնց հետ վերջին 2-3 ամիսներին համատեղ քննարկումների արդիւնքում մշակուել է օրէնսդրական այս նախաձեռնութիւնը: «Եթէ ընդհանրապէս որեւէ քայլ չձեռնարկէինք այս օրէնքի փոփոխութեան առումով, այո', այսօր էս էլ եմ համոզուած, որ մենք կ'ունենայինք մեծ դժգոհութիւն եւ ոչ արդարացի ինչ-որ օրէնք»,-ասաց ՀՀ աշխատանքի եւ սոցիալական հարցերի նախարարը: «Համատեղ աշխատանք, համատեղ չարչարանք, համատեղ տանջանք, եւ այսօր արդէն ունենք օրէնքի բաւականին լաւ տարբերակ: Այսօր, էս համարում եմ, ձեռք ենք բերել շատ նորմալ նախագիծ, ինձ թւում է` մեր բոլորիս մտահոգութիւնը փարատուած է այս նախագծով, եւ կան դեռեւս մի քանի խնդիրներ, որ այստեղ հնչեցուեցին, որոնց կ'անդրադառնանք եւ արդէն կ'ունենաք բոլորիս շահերից բխող համապատասխան օրէնք»,-վստահեցրեց նա: Նշենք, որ գործող օրէնքում հիմնական դժգոհութիւն առաջացրած դրոյթը վերաբերում էր յղիութեան եւ ծննդաբերութեան նպաստին: Մասնաւորապէս, եթէ սահմանուած կարգով հաշուարկուած միջին ամuական աշխատավարձի (եկամտի) չափը գերազանցում է «Նուազագոյն ամuական աշխատավարձի մաuին» oրենքով uահմանուած չափի հնգապատիկը, ապա նպաստը հաշուարկւում է նուազագոյն ամuական աշխատավարձի հնգապատիկից: 2010թ.-ի դեկտեմբերին նուազագոյն ամuական աշխատավարձի չափը սահմանուած էր 30 հազար դրամ, իսկ 2011թ.-ի յունուարի 1-ից` 32,5 հազար դրամ, հետեւաբար` 2010թ.-ի դեկտեմբերին 150 հազար դրամը, իսկ ընթացիկ տարուայ յունուարից 162,5 հազար դրամը գերազանցող միջին ամuական աշխատավարձ կամ եկամուտ ստացող նպաստառուն տուժում է: Բացի այդ, վարձու աշխատողին յղիութեան ու ծննդաբերութեան նպաստը տրւում է ՀՀ աշխատանքային օրէնսգրքով սահմանուած` յղիութեան եւ ծննդաբերութեան արձակուրդի ժամանակաշրջանի միայն աշխատանքային օրերի համար: Նոյեմբերի 24-ին ապագայ մայրերը ՀՀ նախագահի նստավայրի դիմաց պարզել էին «Պարոն նախագահ, ե'տ կանչէք Ձեր ստորագրութիւնը», «Ամո'թ, բիւջէն լցնում էն հայ մայրիկների հաշուին», «Ո'չ ժամանակաւոր անաշխատունակութեան մասին ՀՀ օրէնքի փոփոխութեանը» եւ նմանատիպ այլ ցուցապաստառներ` փորձելով իրենց պահանջները հասցնել նախագահին: Ցոյցի մասնակիցները վճռակամ էին իրենց պահանջին հետամուտ լինելու հարցում: Արդիւնքում, այսօր արդէն ՀՀ աշխատանքի եւ սոցիալական հարցերի նախարարութիւնն արձանագրում է, որ համաձայն գործող օրէնքի, նուազագոյն ամսական աշխատավարձի հնգապատիկից բարձր աշխատավարձ ստացող անձանց տրուող փոխհատուցումը համամասնօրէն նուազում է, ինչը «խնդրահարոյց է բարձր եկամուտներ ունեցող վարձու աշխատողների յղիութեան եւ ծննդաբերութեան նպաստի պարագայում»: Հաշուի առնելով այս փաստը, քննարկուած օրինագծով առաջարկւում է վերացնել նուազագոյն ամսական աշխատավարձի հնգապատիկի չափով առաւելագոյն շեմը, վերանայել վարձու աշխատողի նպաստը հաշուարկելու համար հիմք ընդունուող միջին ամսական աշխատավարձը հաշուարկելու կարգը` այն փոխկապակցելով անաշխատունակութիւնը առաջանալուն նախորդող տասներկուամսեայ ժամանակահատուածում ստացած աշխատավարձի չափի հետ: Եկամուտ է համարուելու աշխատավարձը եւ դրան հաւասարեցուած եկամուտները, ինչպէս նաեւ` նպաստը: Բացի այդ սահմանւում է, որ նպաստը վճարուելու է նաեւ ժամանակաւոր անաշխատունակութեան ժամանակահատուածի տօնական ոչ աշխատանքային օրերի համար` պահպանելով դրա չվճարումը ընդհանուր հանգստեան (շաբաթ եւ կիրակի) օրերի համար: Յաջորդ փոփոխութեամբ առաջարկւում է, որ եթէ վերանայուելիք օրէնքով հաշուարկուած յղիութեան եւ ծննդաբերութեան նպաստի չափը բարձր լինի 2010թ-ի դեկտեմբերի 1-ից յետոյ ներկայումս գործող օրէնքով հաշուարկուած եւ նշանակուած նպաստի չափից, ապա տարբերութիւնը պէտք է վճարուի մէկամսեայ ժամկէտում, ինչը նշանակում է, որ ընդունուելիք օրէնքին կտրուի յետադարձ ուժ: Ինչպէս քննարկումից յետոյ «ՆՏ»-ի թղթակցին յայտնեց «Ժամանակաւոր անաշխատունակութեան նպաստների մասին» օրէնքի կապակցութեամբ ձեւաւորուած քաղաքացիական նախաձեռնութեան անդամ Տաթեւիկ Դաւթեանը, առաջընթաց կայ, որովհետեւ յղի կանանց փոխհատուցման համար վերին շեմ չսահմանելու վերաբերեալ իրենց կարեւորագոյն պահանջներից մէկը հաշուի է առնուել: Ըստ նրա, սակայն հաշուի չէն առնուել մի շարք այլ առաջարկութիւններ, մասնաւորոպես, որպէսզի աւելի բարձր վերին շեմ սահմանուի ժամանակաւոր անաշխատունակութեան այլ դէպքերի փոխհատուցման համար: «Մենք գտնում ենք, որ հիւանդութեան եւ այլ դէպքերի համար պէտք է առնուազն սահմանուի նուազագոյն աշխատավարձի 10-ապատիկի չափով վերին շեմ` գործող 5-ապատիկի փոխարէն, հաշուի առնելով այն, որ բանկային համակարգում, միջազգային կառոյցներում, IT, հեռահաղորդակցութեան ոլորտներում միջին աշխատավարձը մօտ 300 հազար դրամ է»,-ասաց նա: Խումբն ունի նաեւ այլ առաջարկութիւններ, որոնք շարունակելու է ներկայացնել: «Յուսանք, որ քաղաքակիրթ երկխօսութեան միջոցով ինչպէս այս փոփոխութեանը հասանք, այնպէս էլ ուրիշ փոփոխութիւնների կը հասնենք»,-ասաց Տ.Դաւթեանը:

---