Այսօր տեղի ունեցաւ Երեխաների իրաւունքներին եւ մասնակցութեանը նուիրուած ազգային պատանեկան համաժողովը, որը նպատակ ունէր մշակել եւ խմբաւորել երեխաների առաջարկութիւններն իրենց մասնակցութեան եւ իրաւունքների պաշտպանութեան վերաբերեալ` դրանք յետագայում ազգային օրէնսդիր եւ գործադիր մարմիններին ներկայացնելու նպատակով: Համաժողովին մասնակից երեխաները ներգրաւուած են «տարածաշրջանային նախաձեռնութիւն յանուն երեխաների մասնակցութեան» (ՏՆՀԵՄ) ծրագրի շրջանակներում կազմակերպուած «երեխան երեխայի համար» (ԷԵՀ) խմբերում: Միացեալ Ազգերի Կազմակերպութեան Երեխայի իրաւունքների յանձնաժողովի 2008թ. զեկոյցում (A/63/41) նշուած է, որ յաճախ երեխաների կարծիքներն անտեսւում են եւ հաշուի չեն առնւում: Հասարակական այն մտածելակերպը, որ երեխաների տեսակէտները կարեւոր չեն, մինչ օրս էլ լայնօրէն տարածուած է Հարաւային Կովկասում: Դա երեխաների շրջանում առաջացնում է անտարբերութիւն ու յուսահատութիւն, ինչի արդիւնքում ունենում ենք պասիւ եւ մեկուսացուած երիտասարդներ, այլ ոչ թէ իրենց երկրների ժողովրդավարացմանն իրենց մասնակցութեամբ նպաստող ակտիւ քաղաքացիներ: Տեսակէտներ ձեւաւորելու եւ արտայայտելու գործնական հնարաւորութիւնների պակասը յանգեցնում են երեխաների` որպէս իրաւունքի կրողների սահմանափակ ինքնընկալմանն ու նրանց մասնակցային կարողութիւնների թերզարգացմանը: ՏՆՀԵՄ ծրագրի նպատակն է նպաստել Հայաստանի, Ադրբեջանի եւ Վրաստանի երեխաների կարողութիւնների զարգացմանը, որպէսզի նրանք առաջատար դեր խաղան տեղական, ազգային եւ տարածաշրջանային մակարդակներում իրենց իրաւունքների պաշտպանութեան գործում: Ծրագրի շրջանակներում երեխաներն ունեցել են լուրջ նուաճումներ: Խթանուել են երեխաների` համայնքային, մարզային եւ պետական իշխանութիւնների հետ աշխատելու միջոցով հիմնախնդիրներ վերլուծելու եւ դրանց լուծումներ տալու հմտութիւնները: Մեծահասակների օգնութեամբ երեխաները նախաձեռնել եւ կեանքի են կոչել 80 բազմաբնոյթ ծրագրեր` երեխաների իրաւունքներին վերաբերող տարբեր ոլորտներում: Այս ծրագրերի իրականացման ընթացքում երեխաները ուսումնասիրել եւ առաջ են քաշել տուեալ դաշտը կարգաւորող օրէնսդրական հարցերի շուրջ մի շարք առաջարկներ: Ծրագրի այս փուլում` համաժողովի ընթացքում, երեխաները քննարկեցին իրենց խնդիրներն ու ծրագրերը, փորձագէտների օգնութեամբ յստակեցրեցին եւ վերջնական տեսքի բերեցին իրենց առաջարկները, որոնք շուտով կը ներկայացուեն ՀՀ կառավարութիւն եւ Ազգային ժողով: Երեխաների առանձնացրած հիմնախնդիրները վերաբերում են երեխայի մասնակցութեանը, պաշտպանութեանը, կրթութեանը, ազատ ժամանցին, առողջութեանն ու շրջակայ միջավայրի պաշտպանութեանը: Միջոցառման ընթացքում ողջոյնի խօսքով հանդէս եկան ՀՀ Ազգային ժողովի առողջապահութեան, մայրութեան եւ մանկութեան հարցերի մշտական յանձնաժողովի նախագահ Արա Բաբլոյեանը, Հայաստանում Եւրամիութեան պատուիրակութեան գործառնական բաժնի ղեկավար Ժան-Քրիստոֆ Գերանդը, «Սեյվ դը չիլդրեն» կազմակերպութեան հայաստանեան գրասենեակի տնօրէն Իրինա Սաղոյեանը եւ այլոք: «Մենք այս տարածաշրջանային ծրագիրը սկսեցինք նախորդ տարուայ մարտից: Անցել է մօտ մէկ տարի, եւ ես կարող եմ անկեղծօրէն ասել, որ տեսնում եմ, թէ ինչպէս երեխաները կարող են փոփոխութիւններ մտցնել հայ հասարակութեան մէջ»,- ասաց Ժան-Քրիստթոֆ Գերանդը: Նա տեղեկացրեց, որ նման ձեւաչափի նախագծերը նպաստում են երեխաների` հասարակութեանը ամբողջովին ինտէգրուելուն` դառնալով վերջինսիս ակտիւ մասնակիցը: «Մենք պէտք է գնանք այն ճանապարհով, որ բաց չթողնենք այն ժամանակահատուածը, երբ կայանում է ապագայի քաղաքացին»,- նշեց Արա Բաբլոյեանը:

---