Անցնող շուրջ տասը տարիներին Յունաստանում հայ գաղթականներին օժանդակող «Հայաստան» հասարակական մշակութային կենտրոնը Երեւանի Մաշտոցի պուրակի կապակցութեամբ հանդէս է եկել կոչով` ուղղուած բնապահպաններին, ՀՀ կառավարութեանն ու Երեւանի քաղաքապետարանին: Ստորեւ ներկայացնում ենք «Հայաստան» հասարակական մշակութային կենտրոնի կոչը. «Զօրակցում ենք Մաշտոցի պուրակի բնապահպան ակտիւիստների հանրային իրաւունքը պաշտպանող գործունէութեանը, ակտիւիստների նախաձեռնութիւնը պաշտպանող ՀՀ մտաւորականների, գիտաշխատողների եւ լրագրողների շրջահայեաց կեցուածքը եւ պուրակում տեղադրուած կրպակների ապամոնտաժուելու նրանց իրաւացի պահանջը: Հանրային սեփականութեան պաշտպանելն ամէնուրեք բարձրագոյն իրաւունք է եւ անվիճելի օրէնք ու պարտականութիւն, իսկ այս օրերում Մաշտոցի պուրակում կատարուողը, օրինակելի եւ որակական նոր ոստում կարելի է համարել ՀՀ քաղաքացիական եւ հանրային իրաւունքի պաշտպանելու գործում: Երէք տարի անցնելուց յետոյ, կառուցուող կրպակների ապամոնտաժելու մասին ՀՀ կառավարութեան եւ քաղաքապետարանի յանձնարարութիւնն ու հաւաստիացումները ինքնին ապացուցում են կրպակների տեղադրման որոշման անճշտութիւնը, իսկ հանրային իրաւունքը ոտնահարող սխալի սրբագրման երեք տարի ձգձգումն ու յետաձգումը, բնականաբար անբացատրելի եւ անհասկանալի է: Նման կարեւոր սխալի գիտակցութիւնն ու իմացութիւնը ենթադրում է, ոչ միայն սխալի անյապաղ սրբագրումը, այլեւ իրագործողներին պատասխանատուութեան ենթարկելը, այլապէս քաջալերուելու եւ կրկնուելու են հանրային գոյքի եւ սեփականութեան նկատմամբ այսօրինակ ոտնձգութիւնները: Հետեւաբար, կոչ ենք ուղղում ՀՀ կառավարութեան եւ քաղաքապետարանի համապատասխան մարմիններին, չհակադրուելով հասարակական պահանջին եւ ստեղծուած բարդութիւնը անտեղի երկարձգելու փոխարէն, երկխօսութիւն նախաձեռնեն բնապահպան ակտիւիստների ներկայացուցիչների հետ եւ քաղաքացիների իրաւունքը ոտնահարող այս որոշումը սրբագրելով` կանխել ստեղծուած լարուածութեան աննախատեսելի հետեւանքները: ՀՀ մարդու իրաւունքի պաշտպան ինստիտուտին, կոչ ենք ուղղում, իր հանգամանքին անվայել յայտարարութիւն կատարելու փոխարէն, տէր կանգնի իր կոչումին` ջանք չխնայի նպաստելու քաղաքացիների իրաւունքի պաշտպանութեանը եւ լարուածութեան մեղմացմանը: Զսպուածութեան կոչ ենք ուղղում բոլորին, ստեղծուած բարդութիւնը լուծելու` օրէնքի սահմաններում»:

---