Ապրիլի 5-ի նիստում Հայաստանի կառավարութիւնը հաստատել է Գիւմրու տեխնոպարկի գործունէութեան իրականացման 2012 թ. ծրագիրը եւ միջոցառումների ցանկը, որոնցով սահմանւում են պետբիւջէով տեխնոպարկին ընթացիկ տարում յատկացուած 163 մլն դրամի ծախսման ուղղութիւնները: Ըստ ՀՀ կառավարութեան Տեղեկատուութեան եւ հասարակայնութեան հետ կապերի վարչութեան հաղորդագրութեան, այս առնչութեամբ վարչապետ Տիգրան Սարգսեանը կարեւորել է այն, որ տեխնոպարկում արդէն աշխատում են լաբորատորիաները: «մասնաւոր հատուածի հետաքրքրութիւնը չափազանց մեծ է, եւ մենք ֆինանսական միջոցներ ենք յատկացնում, ինչը Գիւմրու տեխնոպարկին հնարաւորութիւն է տալու մասնաւոր հատուածի հետ ծրագրեր իրականացնել: Դա նշանակում է, որ մայիսին կը սկսենք շէնքի շինարարութիւնըէ, - շեշտել է կառավարութեան ղեկավարը: Նիստում կառավարութիւնն իր նախկին որոշումներից երեքում կատարել է փոփոխութիւններ եւ լրացումներ, որոնք կը նպաստեն թանկարժէք մետաղների ոլորտում աշխատանքների իրականացման կատարելագործմանը եւ արդիւնաւէտութեան բարձրացմանը: Մասնաւորապէս, յստակեցուել եւ ՀՀ օրէնսդրութեան պահանջներին են համապատասխանեցուել յարգորոշման եւ յարգադրոշմման արտօնագրման համար պահանջուող փաստաթղթերի ցանկը, յայտում նշուող տուեալները, յայտի քննարկմանը վերաբերող դրոյթները: Յաջորդ որոշմամբ կրճատուել է առեւտրի իրականացման վայրի կազմակերպման գործունէութեան արտօնագրման գործընթացը, այն դարձուել է առաւել մատչելի, ինչի շնորհիւ ակնկալւում է նուազեցնել վարչարարութիւնը: Մէկ այլ որոշման փոփոխման եւ լրացման արդիւնքում ՀՀ օրէնսդրութեան պահանջներին է համապատասխանեցուել երկաթուղային տրանսպորտի գործունէութեան կազմակերպման արտօնագրման կարգը, վերացուել են տեղ գտած անճշտութիւնները: Փոփոխութիւն է կրել մինչեւ 180 օրուայ ընթացքում «Ներմուծում` ազատ շրջանառութեան համար» մաքսային ռեժիմով ներմուծուած ապրանքը ՀՀ տարածքից արտահանելու դէպքում դրա ներմուծման համար գանձուած ԱԱՀ գումարի վերադարձման կարգը: Գումարն ստանալու համար անձն այսուհետեւ դիմելու է միայն մաքսային մարմին (հարկային մարմին այլեւս չի դիմելու)` ներկայացնելով համապատասխան դիմում: Որոշմամբ կը բարելաւուեն գործարար միջավայրի պայմանները: Պետական գոյքի հաշուառման բազայի հաւաստիութեան եւ կառավարելիութեան աստիճանը բարձրացնելու նպատակով գործադիրը փոփոխել է իր աւելի վաղ ընդունած որոշումներից եւս մէկը` ՀՀ ԿԱՅ պետգոյքի կառավարման վարչութեանը պարտաւորեցնելով գոյքի ընտրանքային ուսումնասիրութեան եւ դրա արդիւնքում յայտնաբերուած թերութիւնների հաշուետուութիւնը ներկայացնել ՀՀ կառավարութիւն:

---