ՀՀ կրթութեան եւ գիտութեան նախարար Արմէն Աշոտեանն ապրիլի 6-ին աշխատանքային հանդիպում է ունեցել «Հարաւկովկասեան երկաթուղի»ՓԲԸ գլխաւոր տնօրէն Վիկտոր Ռեբեցի հետ: Նախարարը շնորհակալութիւն է յայտնել պարոն Ռեբեզին «Հարաւկովկասեան երկաթուղի»ընկերութեան սոցիալական պարտաւորութիւն ստանձնելու կապակցութեամբ` նշելով, որ նախարարութիւնը շահագրգռուած է կրթութեան ոլորտում մասնաւոր հատուածի մասնակցութեամբ: Ա. Աշոտեանը վստահեցրել է, որ նախարարութիւնը պատրաստակամ է կեանքի կոչել բոլոր այն ծրագրերը, որոնք կը նպաստեն ինչպէս կրթութեան որակի զարգացմանը, այն պէս էլ տնտեսութիւն-կրթութիւն կապի սերտացմանը եւ հաւաստիացրել, որ ընկերութեան հետ համագործակցութիւնը կրթութեան ոլորտում շարունակական կը լինի: «Վերջին տարիների փորձը ցոյց է տալիս, որ այն ոլորտներում, ուր շուկան ձեւաւորում է յստակ պահանջարկ, մասնագիտական կրթութեան համակարգն անմիջապէս դրան արձագանքում է, ինչպէս դա տեղի է ունեցել տեղեկատուական տեխնոլոգիաների եւ բանկային համակարգի պարագայում», - նշել է Ա. Աշոտեանը եւ յաւելել, որ միջին մասնագիտական կրթութեան ոլորտին վերջին տարիներին նոր շունչ է տրուել, եւ համագործակցութիւնը մասնաւոր բիզնեսի հետ` կոնկրէտ մասնագիտութեամբ կադրեր պատրաստելու ուղղութեամբ, զարգացում է ապրում: «Հարաւկովկասեան երկաթուղի»ՓԲԸ գլխաւոր տնօրէն Վիկտոր Ռեբեցը նշել է, որ ընկերութիւնն ակտիւ համագործակցում է Գիւմրու պետական տեխնիկական քոլեջի, Վանաձորի թիւ 1 արհեստագործական ուսումնարանի եւ Հայաստանի պետական ճարտարագիտական համալսարանի հետ: Այդ համատեքստում տնօրէնն անդրադարձել է նշուած ուսումնական հաստատութիւնների դասասենեակների յագեցուածութեան, գրադարանները համապատասխան գրականութեամբ համալրման, ՀՊՃՀ ուսանողների Ռուսաստանի Դաշնութեան համապատասխան բուհում կրթութիւնը շարունակելու հնարաւորութեան եւ որակաւորման բարձրացման խնդիրներին:

---