ՀՊՏՀ ռեկտոր Կորիւն Աթոյեանն ապրիլի 11-ին բուհում հիւրընկալեց ՀՀ ԿԳ նախարար Արմէն Աշոտեանին եւ «Փիւնիկ» համահայկական հիմնադրամի հոգաբարձուների խորհրդի նախագահ Լեւոն սարգսեանին: Պատուաւոր հիւրերին հիւրընկալելու առիթը հիմնադրամի եւ նախարարութեան միջեւ համագործակցութեան յուշագրի ստորագրումն էր, ինչպէս նաեւ ՀՊՏՀ մարքեթինգի եւ բիզնեսի կազմակերպման ֆակուլտետում «Փիւնիկ»-ի նուիրատուութեամբ հիմնանորոգուած եւ համակարգիչներով կահաւորուած լսարանի հանդիսաւոր բացումը: «Համագործակցութեան այս յուշագիրը վաւերացնում է մեր անցած ճանապարհի արդիւնքները եւ նոր հեռանկարներ է ստեղծում»,- յուշագրի ստորագրումից յետոյ ասաց ՀՀ ԿԳ նախարարը եւ անդրադարձ կատարեց կրթութեան ոլորտում «Փիւնիկ» բարեգործական հիմնադրամի գործունէութեանը, որում դրսեւորւում է կազմակերպութեան բարձր հանրային գիտակցութիւնն ու սոցիալական պատասխանատուութիւնը: «Փիւնիկ» հիմնադրամի հոգաբարձուների խորհրդի նախագահ Լեւոն Սարգսեանը նշեց, որ իրենց հիմնադրամն աշխատանքներ է կատարում բազմաթիւ ոլորտներում` շեշտադրելով, սակայն, կրթութեան ոլորտը: Ընդգծելով, որ իրենց հիմնադրամը այդպէս էլ կոչւում է` «Մարդկային ռեսուրսների զարգացման համահայկական հիմնադրամ», Լեւոն Սարգսեանը նշեց, որ առանց կրթուած սերունդ ունենալու հնարաւոր չէ լաւ ապագայ կառուցել: Յուշագրի ստորագրումից յետոյ հիւրերը եղան մարքեթինգի եւ բիզնեսի կազմակերպման ֆակուլտետում, որտեղ Լեւոն Սարգսեանն ու ՀՊՏՀ ռեկտոր Կորիւն Աթոյեանը կատարեցին «Փիւնիկ» հիմնադրամի միջոցներով վերանորոգուած եւ համակարգչային տեխնիկայով համալրուած լսարանի բացումը: ՀՊՏՀ Լրատուութեան եւ հասարակայնութեան հետ կապերի բաժնից յայտնում են, որ ՀՊՏՀ ռեկտոր Կորիւն Աթոյեանն ընդգծեց նման յարմարաւէտ ու տեխնիկապէս յագեցած լսարանների կարեւորութիւնը` շեշտելով, որ «Փիւնիկ»հիմնադրամի նուիրատուութեան շնորհիւ բուհում ուսումնառութիւնը կը դառնայ աւելի արդիւնաւէտ եւ կրթութեան ժամանակակից զարգացումներին ու պահանջին աւելի համահունչ:

---