Ապրիլի 12-ին «ժառանգութեան»շտաբի ներկայացուցիչները` ի դէմս Ազգային ժողովի պատգամաւորներ Ստեօպայ Սաֆարեանի ու Արմէն Մարտիրոսեանի, ինչպէսեւ «Ազատ դեմոկրատներ» կուսակցութիւնից` Անոյշ Սեդրակեանի ու Արմէն Առաքէլեանի, խորհրդարանում հանդիպեցին Եւրոպայի խորհրդի Խորհրդարանական վեհաժողովի (ԵԽԽՎ) դիտորդական առաքելութեան հետ: Բարոնուհի Էմմա Նիքոլսոնը (Baroness Nicholson of Winterbourn) ներկայացրեց պատուիրակութեան կազմը` լեհաստանցի սենատոր Պեօտր Վախին (Piotor Wach), ԵԽԽՎ միջխորհրդարանական համագործակցութեան եւ ընտրութիւնների դիտարկման քարտուղար Բոգդան Թորչաթորիուին (Bogdan Torcatoriu), ԵԽԽՎ Մոնիթորինգի յանձնաժողովի քարտուղար Բաս Քլայնին: Հանդիպմանը ներկայ էր նաեւ ԵԽ երեւանեան գրասենեակի ղեկավար Սիլվիա Զեհեն: «Լիայոյս եմ, որ «ժառանգութեան» եւ ԵԽԽՎ դիտորդական առաքելութեան համագործակցութիւնը եւ նախնական միջանկեալ զեկոյցների հրապարակումները կը կանխեն առկայ եւ հնարաւոր կ'եղծիքները»,- նշեց Սաֆարեանը: Ինչպէս «Նոյեան Տապան»-ին յայտնեցին «Ժառանգութեան» նախընտրական շտաբի լրատուական ծառայութիւնից, հիւրերի խնդրանքով «ժառանգութեան»շտաբի անդամներն անդրադարձան խորհրդարանական ընտրութիւնների քարոզարշաւից առաջ եւ դրա ընթացքում դիտարկուած մտահոգիչ դրսեւորումներին, մեծամասնական ու համամասնական ընտրակարգերում առկայ խախտումներին, արծարծեցին ընտրացուցակներում ընտրողների թուի ուռճացմանը, արձանագրուած բռնութեան, որոշ կուսակցութիւնների կողմից ընտրակաշառքի բաժանման դէպքերին, քաղաքական ենթատեքստով արուող բարեգործութիւններին եւ անձնագրերի հաւաքագրմանն առնչուող խնդիրներ:

---