Ապրիլի 16-ին կայացաւ արտգործնախարար Էդուարդ Նալբանդեանի հանդիպումը պաշտօնական այցով Երեւանում գտնուող Բելառուսի ԱԳ Սերգեյ Մարտինովի հետ: Ողջունելով հիւրին` նախարար Նալբանդեանը նշեց, որ երկու երկրների ղեկավարների ջանքերի շնորհիւ վերջին տարիներին հայ-բելառուսական յարաբերութիւնները զգալի զարգացում են ապրել համագործակցութեան տարբեր բնագաւառներում: Նախարար Նալբանդեանն ընդգծեց, որ առկայ են բոլոր նախադրեալներն երկկողմ յարաբերութիւնների առաւել ամրապնդման համար, եւ վստահութիւն յայտնեց, որ կողմերը յաւելեալ ջանքեր կը գործադրեն այդ ուղղութեամբ: Նախարար Մարտինովը, շնորհակալութիւն յայտնելով Երեւան այցելելու հրաւէրի համար, իր հերթին եւս գոհունակութիւն յայտնեց երկկողմ յարաբերութիւնների բարձր մակարդակի եւ դինամիկ զարգացող համագործակցութեան առնչութեամբ: Երկուստէք շեշտուեց, որ բարձր մակարդակի քաղաքական երկխօսութիւնը, փոխայցելութիւնները, խորհրդարանական կապերը, ապակենտրոնացուած համագործակցութիւնը, տնտեսական փոխգործակցութիւնը, մշակութային փոխանակումները հնարաւորութիւն են տալիս առաւել խորացնել երկու ժողովուրդների միջեւ բարեկամութիւնը: Նախարարներն անդրադարձան երկու երկրների ղեկավարների միջեւ ձեռք բերուած պայմանաւորուածութիւնների եւ նրանց կողմից տրուած յանձնարարականների կատարման ընթացքին: Հայաստանի եւ Բելառուսի արտգործնախարարները քննարկեցին երկկողմ, տարածաշրջանային եւ միջազգային հարցերի լայն շրջանակ: Էդուարդ Նալբանդեանն ու Սերգեյ Մարտինովը անդրադարձան երկկողմ առեւտրատնտեսական փոխգործակցութեանը, դրա դիւերսիֆիկացման հնարաւորութիւններին, տնտեսական համագործակցութեան միջկառավարական յանձնաժողովի աշխատանքներին: Հայաստանի եւ Բելառուսի արտգործնախարարները քննարկեցին նաեւ մշակութային փոխանակումների առաւել ակտիւացման նպատակով ձեռնարկուելիք քայլերը: Սերգեյ Մարտինովի խնդրանքով Էդուարդ Նալբանդեանը ներկայացրեց արցախեան հիմնախնդրի կարգաւորմանն ուղղուած բանակցութիւնների վերջին զարգացումները: Ինչպէս տեղեկացնում են ՀՀ ԱԳՆ մամուլի, տեղեկատուութեան եւ հասարակայնութեան հետ կապի վարչութիւնից, հանդիպումից յետոյ Հայաստանի եւ Բելառուսի արտաքին գործերի նախարարները հանդէս եկան համատեղ մամուլի ասուլիսով:

---