Հերթական անգամ Պտղնի գիւղին յարակից ձորում վթարուել է “Արզնի 2-Երեւան” ջրատարը: Հերթական` որովհետեւ հողն այստեղ ինչ-ինչ պատճառներով աւելի ագրեսիւ է եւ ժամանակ առ ժամանակ ջրատարի վթարի պատճառ է հանդիսանում:
Վերջին անգամ` ձմռանը “Երեւան Ջուր” ՓԲԸ Խմելու ջրի արտադրութեան եւ տեղափոխման վարչութեան աշխատակիցները կարողացան վերականգնել ջրատարի աշխատանքը` “կարկատելով” վթարուած հատուածը: Այսօր իրավիճակն այլ է, եւ ընկերութիւնը ստիպուած է փոխարինել 800մմ տրամագծով ջրատարի 33մ երկարութեամբ մի հատուած:
Ըստ ընկերութեան Ջրարտադրութեան, անվտանգութեան, առողջապահութեան եւ բնապահպանական հարցերով տնօրէն Արմէն Նիազեանի` հաշուի առնելով եղանակային անբարենպաստ պայմանները, արւում է ամէն ինչ աշխատանքները հնարաւորինս արագ արդէն ապրիլի 25-ին ուշ երեկոյեան աւարտելու համար, նպատակ ունենալով ոչ ուշ քան ապրիլի 26-ը ժամը 21.00, ինչպէս եւ յայտարարուել էր, ջրատարը վերագործարկել եւ վերսկսել ջրամատակարարումը Արաբկիր ու Մալաթիա-Սեբաստիայ վարչական շրջաններում:
Հաղորդակցութեան բաժնից յայտնում են, որ այդ նոյն ժամանակ, համակարգում ձեւաւորուած պրակտիկայի համաձայն օգտուելով ջրատարի կանգառից, ընկերութեան “արեւմուտք” շահագործման տնօրինութիւնն իրականացնում էր որոշ կանխարգելիչ աշխատանքներ Արաբկիրում: