«Ազատ դեմոկրատներ». «Ընտրութիւնները չարդարացրին մեր, ինչպէս նաեւ այլ քաղաքական ուժերի եւ հայ հասարակութեան ակնկալիքները»
15-05-2012 14:44:17 | Հայաստան | Քաղաքական
2012թ. մայիսի 6-ին տեղի ունեցած խորհրդարանական ընտրութիւնները կարող էին լաւ հիմք հանդիսանալ Հայաստանի ժողովրդավարացման եւ ազատականացման ճանապարհին, սակայն պէտք է արձանագրենք, որ այս ընտրութիւնները չարդարացրին մեր, ինչպէս նաեւ այլ քաղաքական ուժերի եւ հայ հասարակութեան ակնկալիքները:
Ընտրութիւնների արդիւնքները ցոյց տուեցին, որ ՀՀ քաղաքացու ընտրութեան իրաւունքի ազատ իրացման վրայ մեծ ազդեցութիւն ունի երկրի սոցիալ-տնտեսական անմխիթար վիճակը, ինչից էլ օգտուեցին իշխանական կուսակցութիւնները` գործի դնելով իրենց վարչական եւ ֆինանսական ողջ ռեսուրսը: Սոյն թուականի մայիսի 6-ի ընտրութիւնների իրական արդիւնքները եւ ազատ, արդար մթնոլորտում ընտրութիւն իրականացնելու նպատակադրութիւնը ստուերեցին ընտրակաշառքի եւ կեղծ բարեգործութեան աղաղակող չափերի հասնող դէպքերը:
Ցաւօք, այս ընտրութիւնները չարձանագրեցին ՀՀ քաղաքացու իրական կամքը եւ քաղաքական ուժերի իրական յարաբերակցութիւնը խորհրդարանում: Այս անգամ եւս ժողովրդի կամքը ստորադասուեց ընտրակաշառքների տարափին: Արձանագրուեց նաեւ մի հանգամանք, որ ընտրակեղծիքների մեխանիզմները բաւականին յղկուել են եւ դրանք չեն իրականացւում ընտրատեղամասերում, այլ գործի են դրւում տեղամասերից դուրս եւ մինչ ընտրութիւնների օրը` օգտագործելով վարչական եւ ֆինանսական ողջ ներուժը:
«Ազատ դեմոկրատներ» կուսակցութիւնն արձանագրում է, որ թէեւ ընտրատեղամասերում ընտրական գործընթացի բուն ընթացքը, այդ թւում` քուէաթերթիկների հաշուարկը, ինչպէս նաեւ նախընտրական քարոզչութեան ընթացքում հեռուստաեթերի օգտագործման համեմատաբար հաւասար պայմանների ապահովումը կարելի է գնահատել որպէս առաջխաղացում նախորդ ընտրութիւնների համեմատ, այդուհանդերձ` ընտրատեղամասերից դուրս իրականացուած զանգուածային ընտրախախտումները մթագնել են ընտրութիւնների օրինականութիւնը եւ լեգիտիմութիւնը:
Շնորհակալ ենք ՀՀ այն քաղաքացիներից, ովքեր իրենց ձայնը վստահել են Ազատ դեմոկրատներ-ժառանգութիւն կուսակցութիւններից եւ հանրային սեկտորի ներկայացուցիչներից ձեւաւորուած միասնական թիմին եւ քուէարկել յանուն Նոր Հայաստանի: Շնորհակալ ենք նաեւ այն քաղաքացիներից, ովքեր կատարել են գիտակցուած ընտրութիւն եւ իրենց քաղաքացիական պարտքի իրականացումը չի ստուերուել ընտրակաշառք կոչուած արատաւոր երեւոյթով:
Արձնագրելով այն հանգամանքը, որ այս ընտրութիւնները եւս չարտայայտեցին ՀՀ քաղաքացու իրական կամքը, «ազատ դեմոկրատներէ կուսակցութիւնն, այդուամենայնիւ, չի նահանջում եւ շարունակելու է իր սկզբունքային պայքարը յանուն Նոր Հայաստանի եւ յանուն ՀՀ քաղաքացու բարօրութեան:
«Ազատ դեմոկրատներ» կուսակցութեան վարչութիւն