Պարոնեան փողոցում, թիւ 21 շէնքի դիմաց, մայիսի 23-ին “Երեւան Ջուր” ՓԲԸ վերակառուցում էր հերթական դիտահորը: Հերթական, որովհետեւ մէկ շաբաթ առաջ նոյն փողոցում արդէն վերանորոգուել է երկու դիտահոր, ինչը զգալիօրէն նպաստել է տարածքի ջրամատակարարման բարելաւմանը: Տուեալ, թուով երրորդ դիտահորն իրենից ներկայացնում է խոշոր ջրաբաշխիչ հանգոյց, որը կոչուած է կարգաւորելու Պարոնեան փողոցի եւ յարակից տարածքների, ինչպէս նաեւ Կոնդի զգալի մասի ջրամատակարարումը: Կոչուած է, բայց չի ծառայում իր նպատակին, որովհետեւ վերանորոգման կարիք ունի, իսկ առկայ 4 փականներն ընդհանրապէս չեն գործում: Ինչպէս տեղեկացրեց ընկերութեան “Արեւմուտք” շահագործման տնօրինութեան “Արաբկիր” տեղամասի գլխաւոր ճարտարագէտ Գաբրիէլ Մելիքսէթեանը, իրականացուող աշխատանքերի շրջանակներում կը փոխարինուեն փականները, որի շնորհիւ հնարաւոր կը լինի կարգաւորել ջրամատակարարումը բոլոր 4 ուղղութիւններով, ապահովելով ամէնուր բաւարար ճնշում: Դրանից բացի, շինարարական կամ վերանորոգման աշխատանքների ժամանակ այսուհետ հնարաւոր կը լինի դադարեցնել միայն տուեալ տարածքի, բայց ողջ թաղամասի ջրամատակարարումը, ինչպէս մինչ այդ: Ըստ զրուցակցի, աշխատանքներն ընթանում են նախատեսուածի համաձայն եւ ուշ երեկոյեան կը վերսկսուի “Նաիրի” բժշկական կենտրոնի, “3-րդ շտապ օգնութեան” հիւանդանոցի, “Հրազդան” հիւրանոցի, Պարոնեան փող. 15-ից բարձր եւ Իսրայէլեան 43 համարների, Ձորափ եւ Կոնդ թաղամասերի ու յարակից տարածքների ջրամատակարարումը:

---