Երեւանի քաղաքապետ Տարօն Մարգարեանը մասնակցել է քաղաքապետարանի ենթակայութեան «Նորք Մարաշ»ԲԿ -ի եւ «Ազգային Էթնիկ Կազմակերպութիւնների Կ'ոալիցիա»միջազգային ընկերութեան միջեւ համագործակցութեան յուշագրի ստորագրման արարողութեանը: Համաձայն յուշագրի «Նորք Մարաշ»ԲԿ -ում կը մեկնարկի համատեղ բարեգործական ծրագիր, որի շրջանակում սրտի արատով տառապող երեխաների վիրահատական եւ անհհրաժեշտ բուժման ծախսերը կը հոգա միջազգային ընկերութիւնը, իսկ վիրահատութիւնները կ'իրականացնեն «Նորք Մարաշ»ԲԿ -ի փորձառու վիրաբոյժները: Կարեւորելով միջազգային կառոյցների հետ համատեղ բարեգործական ծրագրերի իրականացումն ու յատկապէս երեխաների առողջութեան վերականգնման առաջնահերթութիւնը, Տարօն Մարգարեանը շնորհակալութիւն է յայտնել մարդասիրական կարեւոր առաքելութեանն աջակցութիւն ցուցաբերելու պատրաստակամութեան համար. «Սայ իրապէս կարեւոր եւ անհրաժեշտ համագործակցութիւն կարելի է որակել, քանզի բազմաթիւ երեխաներ հնարաւորութիւն կը ստանան վերականգնել իրենց առողջութիւնն ու առողջ ապրելակերպը: որպէս Երեւանի քաղաքապետ կարող եմ վստահեցնել, որ մենք միշտ սատարելու ենք նմանատիպ բարեգործական եւ մարդասիրական նախաձեռնութիւններին, յատկապէս հաշուի առնելով, որ մեր ենթակայութեան այս հաստատութիւնը տարածաշրջանում միակ մասնագիտացած բուժհաստատութիւնն է, որն իր որակական չափանիշներով մեծ համբաւ է վայելում ամբողջ աշխարհում: Յատկանշական է, որ «Նորք Մարաշ»ԲԿ -ը գտնւում է նաեւ Հանրապետութեան նախագահի մշտական ուշադրութեան եւ հոգածութեան ներքոյ: Ըստ այդմ, վստահ եմ, մենք ունենք բոլոր հնարաւորութիւնները անհրաժեշտ որակեալ բուժում ապահովել ոչ միայն տարածաշրջանի, այլ նաեւ աշխարհի տարբեր երկրների մանուկների համար»,-ընդգծել է Երեւանի քաղաքապետը: Ազգային Էթնիկ Կազմակերպութիւնների Կոալիցիայի վարչութեան նախագահ Նասեր Կազեմինն իր հերթին վստահեցրել է, որ իրենց ընտրութեան հարցում եւս շատ կարեւոր դերակատարում է ունեցել հէնց բժշկական կենտրոնի համաշխարհային ճանաչումն ու տարածաշրջանում միակը լինելու հանգամանքը: «բոլոր նախադրեալները կան, որ մեր համագործակցութիւնը լինի երկարատեւ: Ունենալով ժամանակակից սարքաւորումներ եւ բարձր որակաւորմամբ մասնագէտներ, վստահ եմ, «Նորք Մարաշ»ԲԿ -ը երեխաներին կը մատուցի իսկապէս բարձրակարգ բուժօգնութիւն եւ, որ ոչ պակաս կարեւոր է, կ'ապահովի մեր հիմնական նպատակի իրականացմանը. այն է, բարձրակարգ բուժօգնութիւն ապահովել դրա կարիքն ունեցող տարածաշրջանի բոլոր երկրների երեխաների համար>> - ընդգծել է Նասեր Կազեմինը:

---