Ծիրանի արտահանման գործընթացի նախաշեմին ՀՀ գիւղատնտեսութեան նախարարի պաշտօնակատար Սերգօ Կարապետեանն այսօր խորհրդակցութեան էր հրաւիրել հանրապետութիւնից թարմ պտուղ-բաջարեղէն արտահանող իրաւաբանական եւ ֆիզիկական անձանց ներկայացուցիչներին: «Անցեալ տարի շատ լաւ կազմակերպուեց արտահանման գործընթացը, ինչը նպաստեց ինչպէս մեր տնտեսութեան առաջընթացին, այնպէս էլ տեղերից ստացուող դժգոհութիւնների նուազմանը: Պետութիւնը խրախուսում է արտահանումը, յատկապէս միջազգային շուկայում հետաքրքրութիւն ներկայացնող ապրանքների դէպքում, ինչպիսին ծիրանն է: Բոլոր պայմանները ստեղծուած են արտահանման հետ կապուած խոչընդոտները բացառելու, գործընթացի մատչելիութիւնն ապահովելու համար, հարկային դաշտն ազատ է: Ամէն ինչ անելու ենք, որպէսզի ծիրանի ու առհասարակ պտուղ – բանջարեղէնի արտահանումն իրականացուի ժամանակին ու անկորուստ: Հետեւողական աշխատանքների շնորհիւ կառավարութունը նպաստելու է արտահանման ծաւալների մեծացմանը», -նշեց նախարարի ժամանակաւոր պաշտօնակատարը` լսելով նաեւ պտուղ-բաջարեղէն արտահանող իրաւաբանական եւ ֆիզիկական անձանց ներկայացուցիչների առաջարկները: Վերջիններս իրենց հերթին հաւաստիացրին, որ մթերման գները լինելու են խելամիտ, կողմերի համար փոխշահաւէտ, վճարումները կատարուելու են կազմակերպուած եւ ժամանակին: Նշուեց, որ ըստ թարմ պտուղ – բանջարեղէնի արտահանման ծաւալների մոնիթորինգի, ընթացիկ տարում նախատեսուող արտահանումները կը գերազանցեն նախորդ տարուայ ցուցանիշը: Ի դէպ, այսօրուայ դրութեամբ 1746 տոննա թարմ պտուղ- բանջարեղէնի արտահանման ցուցանիշը նոյնպէս զգալիօրէն աւելի է նախորդ տարուայ ցուցանիշից:

---