Վարդան Օսկանեանի յայտարարութիւնը. «Կառավարութեանն առընթեր ազգային անվտանգութեան ծառայութիւնը ինձ որպէս վկայ հրաւիրել էր ցուցմունք տալու Քրէական օրէնսգրքի 190-րդ յօդուածի 3-րդ կէտի («հանցաւոր ճանապարհով ստացուած եկամուտներն օրինականացնելը (փողերի լուացումը)է) յատկանիշներով յարուցուած քրէական գործի շրջանակում, որն առնչւում է ինձ եւ իմ հիմնադրած Սիւիլիթաս հիմնադրամի գործունէութեանը: Հիմնադրման օրուանից` Սիւիլիթաս հիմնադրամի գործունէութիւնը եղել է թափանցիկ եւ օրէնքի տառին ու ոգուն համապատասխան: Սիւիլիթասի գործունէութեան առաջին օրերից` 2008-ից սկսած` հիմնադրամին ֆինանսաւորել եւ նրա հետ համատեղ ծրագրեր են իրականացրել Նիդեռլանդների եւ Լեհաստանի կառավարութիւնները, Նորվեգիայի եւ Գերմանիայի արտաքին գործերի նախարարութիւնները, Շուեյցարիայի եւ Միացեալ Թագաւորութեան զարգացման գործակալութիւնները, Հայաստանում ԱՄՆ դեսպանութիւնը, ԵԱՀԿ երեւանեան գրասենեակը, ինչպէս նաեւ այլ հեղինակաւոր կազմակերպութիւններ, կորպորացիաներ եւ անհատներ: Այս ամէնի մասին չէին կարող չիմանալ Հայաստանի Հանրապետութեան համապատասխան կառոյցները: Ինձ համար զարմանալի եւ տարօրինակ է, որ իմ եւ Սիւիլիթաս հիմնադրամի գործունէութիւնը որեւէ կերպ կարող է շաղկապուել յանցաւոր եւ անօրինական փողերի հետ: Առաւել զարմանալի է, որ նման հարց առաջ է քաշւում հէնց այն ժամանակ, երբ ես ներգրաւուել եմ քաղաքական գործընթացներում: Ակնյայտ է, որ յարուցուած քրէական գործի հետեւում քաղաքական պատուէր կ'ա»: Վ. Օսկանեան

---