Նախագահ Սերժ Սարգսեանը յունիսի 11-ին ընդունել է Չինաստանի Ժողովրդական Հանրապետութեան գլխաւոր դատախազ Ցաոյ Ձեանմինին: Սերժ Սարգսեանը գոհունակութեամբ է արձանագրել Հայաստանի եւ Չինաստանի միջեւ դիւանագիտական յարաբերութիւնների հաստատումից ի վեր երկկողմ յարաբերութիւնների բարձր մակարդակը` դրա վկայութիւնը համարելով տարբեր ոլորտներում, այդ թւում` իրաւապահպանութեան, հայ-չինական վերընթաց զարգացող համագործակցութիւնը: Հանրապետութեան ղեկավարը վերահաստատել է Հայաստանի պատրաստակամութիւնը շարունակելու այդ գործընթացը: Չինաստանի գլխաւոր դատախազը երկու երկրների գլխաւոր դատախազութիւնների փոխգործակցութեան զարգացման եւ փորձի փոխանակման տեսանկիւնից կարեւորել է այսօր ՀՀ եւ ՉԺՀ գլխաւոր դատախազութիւնների միջեւ ստորագրուած համագործակցութեան ծրագիրը, նշելով, որ ՀՀ գլխաւոր դատախազութեան հետ դեռեւս 1999 թուականից սկիզբ առած համագործակցութիւնը տարէցտարի ամրապնդւում է` նպաստելով հայ-չինական երկկողմ կապերի առաւել սերտացմանը:Այս մասին «ՆՏ»-ին յայտնեցին ՀՀ նախագահի աշխատակազմի հասարակայնութեան եւ տեղեկատուութեան միջոցների հետ վարչութիւնից:

---