Շուեյցարիայում Հայաստանի դեսպան Շառլ Ազնաւուրը երէկ հանդիպել է ՄԱԿ-ի փախստականների հարցերով գերագոյն յանձնակատար Անտօնիոյ Գուտերեշի հետ: Արտգործնախարարութեան մամուլի եւ տեղեկատուութեան վարչութեան փոխանցմամբ` հանդիպման ընթացքում քննարկուել են յանձնակատարի գրասենեակի եւ Հայաստանի միջեւ համագործակցութեան ուղղութիւնները եւ ծրագրերը: Ազնաւուրը կարեւորել է Ադրբեջանից բռնագաղթած փախստականների բնակարանային պայմանների խնդրի լուծման նպատակով անցած տարի Երեւանում կազմակերպուած դոնորների համաժողովին յանձնակատարի մասնակցութիւնը եւ ընդգծել այդ նախաձեռնութեան շարունակման ուղղութեամբ Հայաստանի յետագայ ջանքերին աջակցելու անհրաժեշտութիւնը: Գուտերեշը նշել է իր եւ գրասենեակի մշտական ուշադրութիւնը ամբողջ աշխարհում եւ, մասնաւորապէս, Հայաստանում փախստականների ու ներքին տեղահանուած անձանց խնդիրների լուծման հարցում եւ հաստատել գրասենեակի պատրաստակամութիւնը` Հայաստանին աջակցելու փախստականների հարցը վերջնականապէս լուծելուն ուղղուած նախաձեռնութիւններում:

---