ՀՀ կրթութեան եւ գիտութեան նախարարի պաշտօնակատար Արմէն Աշոտեանն այսօր ընդունել է ՀՀ-ում Էկուադորի նորանշանակ դեսպան Պատրիսիոյ Ալբերտոյ Չաւես Սաւալային: Շնորհաւորելով դեսպանին մեր երկրում դիւանագիտական առաքելութիւն սկսելու կապակցութեամբ` Արմէն Աշոտեանը յոյս է յայտնել, որ դեսպանն իր գործունէութեամբ մեծ ներդրում կ'ունենայ կրթութեան եւ գիտութեան ոլորտում երկու երկրների յարաբերութիւնների ամրապնդման եւ համագործակցութեան ընդլայնման գործում: Նախարարի պաշտօնակատարն ընդգծել է, որ ՀՀ կառավարութեան համար կրթութեան ոլորտի զարգացումը գերակայ ուղղութիւններից մէկն է` այդ համատեքստում ընդգծելով, որ Հայաստանը համագործակցում է Լատինական Ամերիկայի առայժմ երկու պետութեան` Արգենտինայի եւ Չիլիի հետ եւ յոյս յայտնել, որ հետայսու ամուր հիմքեր կը դրուեն նաեւ Էկուադորի հետ հնարաւոր համագործակցութեան դաշտում: Արմէն Աշոտեանը դեսպանին ներկայացրել է Հայաստանի կրթութեան ոլորտի գերակայութիւնները, մասնաւորապէս, կրթութեան հասանելիութեան, որակի, իրականացուող բարեփոխումների եւ ակնկալուող արդիւնքների համատեքստում: Կրթութեան եւ գիտութեան ոլորտում երկրների միջեւ սահմանները հեշտ են քանդւում”, - նշել է նախարարի պաշտօնակատարը` յոյս յայտնելով, որ միջբուհական համագործակցութիւնը եւ փորձի փոխանակումը ազդակ կը հանդիսանան արդիւնաւէտ համագործակցութեան համար: Դեսպան Պատրիսիոյ Ալբերտոյ Չաւես Սաւալայը նշել է, որ Էկուադորը կարեւորում է կրթութեան եւ գիտութեան դերը երկրի զարգացման գործում, եւ այդ ուղղութեամբ վերջին տարիներին, ըստ դեսպանի, էկուադորը հսկայական առաջընթաց է արձանագրել, մասնաւորապէս, գիտելիքի արժեւորման, կրթութեան որակի, մտածելակերպի փոփոխութեան տեսանկիւնից: Դեսպանը, ներկայացնելով կրթութեան եւ գիտութեան ոլորտում իրականացուող բարեփոխումների ընթացքը, ընդգծել է, որ ինչպէս աշխարհի տարբեր երկրներում, այնպէս էլ Էկուադորում այդ գործընթացները միշտ չէ, որ հանրային լայն աջակցութիւն են ունեն ում, որովհետեւ դրանց արդիւնքը տեսանելի է լինելու տարիներ, երբեմն նաեւ տասնամեակներ անց: Դեսպան Պատրիսիոյ Ալբերտոյ Չաւես Սաւալայը յոյս է յայտնել, որ երկու երկրների միջեւ արդիւնաւէտ համագործակցութեան հիմք կը դրուի, միաժամանակ տեղեկացնելով, որ Երեւանում արդէն հասցրել է հանդիպումներ ունենալ գիտութեան ու կրթութեան ոլորտի ներկայացուցիչների հետ, ծանօթացել առկայ գիտական ներուժին եւ տպաւորուել որոշակի ցուցանիշներով: Հանդիպման աւարտին անդրադարձ է եղել կրթութեան եւ գիտութեան ոլորտում երկու երկրների միջեւ համագործակցութեան համաձայնագրի ստորագրման, ինչպէս նաեւ որոշ հանրակրթական դպրոցներում իսպաներէնի` որպէս օտար լեզուի դասաւանդման, հայաստանեան բուհերից մէկում իսպաներէն լեզուի կենտրոնի հիմնման հնարաւորութեանը:

---