Հայաստանում ժամանակակից այգեգործութեան ներդրման, թարմ մրգի եւ ընկուզեղէնի արտահանման, հայկական մրգի համբաւն ու բարի անունը տարածաշրջանային եւ միջազգային շուկայում ներկայացնելու նպատակով կառավարութիւնը 2011 թ. նոյեմբերին ստեղծել էր «հայկական միրգէ ԲԲԸ: Այժմ որոշում է ընդունուել ընկերութեանը յանձնել համապատասխան տարածք եւ հող` իբրեւ նախորդ որոշմամբ սահմանուած ներդրումների ապահովում: «Սայ կարեւոր ծրագիր է, որից մենք լուրջ արդիւնքներ ենք ակնկալում հայկական այգիների արտադրողականութեան աճի առումով, որովհետեւ առաջին անգամ ժամանակակից տեխնոլոգիաներ են կիրառուելու, որ մէկ հեկտարից աւելի շատ պտուղ կարողանանք ստանալ: Այնպէս որ, այս փորձը պէտք է տարածենք գիւղատնտեսական բոլոր ոլորտներում», - ասել է վարչապետ Տիգրան Սարգսեանը: Մէկ այլ որոշմամբ «Հայաստանի պետական ագրարային համալսարան»ՊՈԱԿ-ը վերակազմաւորուել է «Հայաստանի ազգային ագրարային համալսարան»հիմնադրամի, ինչի շնորհիւ կը մեծանայ համալսարանի ձեռնարկատիրական գործունէութեան արդիւնաւէտութիւնը, կը ներգրաւուեն արտաքին ներդրողներ: Փաստօրէն մեր երկրում փորձ է արւում ստեղծել արեւմտեան տիպի առաջին հետազօտական համալսարանը: Ինչպէս յայտնում են ՀՀ Կառավարութեան տեղեկատուութեան եւ հասարակայնութեան հետ կապերի վարչութիւնից, կառավարութեան որոշմամբ «Երուերելակ» ՓԲԸ բաժնետոմսերը կը մասնաւորեցուեն դասական աճուրդով: Այս ընկերութիւնը մասնաւորեցման է ներկայացւում առաջին անգամ: Բաժնետոմսերի գնահատուած արժէքը կազմել է 257 մլն 809 հազար դրամ, գնահատուած պարտաւորութիւնները` 3 մլն 772 հազար 200 դրամ: Ակնկալւում է ընկերութեան մասնաւորեցման ճանապարհով վերականգնել դրա կանոնաւոր գործունէութիւնը, աւելացնել պետբիւջէի մուտքերը: Իր նիստում կառավարութիւնը «Ախուրեան-Արաքս-Ջրառ« ՓԲԸ-ին թոյլատրել է իրեն պատկանող Անի N1 պոմպակայանով վճարել այդ ընկերութեան կողմից տեղաբաշխուած` պետութեանը պատկանող համապատասխան թուով բաժնետոմսերի ձեռքբերման դիմաց` գոյքն ամրացնելով ջրային տնտեսութեան պետական կոմիտէի աշխատակազմին: Նշուած պոմպակայանը, որը կառուցուել է 1970-ական թուականներին եւ 1989 թուականից չի շահագործւում, քայքայուել է եւ թալանուել: Որոշումը միտուած է պոմպակայանի հիմնանորոգմանը եւ գործարկմանը, ինչի շնորհիւ կը կազմակերպուի Գետքի գիւղական համայնքի ցանքատարածութիւնների արհեստական ոռոգումը:

---