Տիգրան Սարգսեանն ընդունել է Աւստրալիայի վարչապետի յատուկ բանագնացին
25-06-2012 17:19:11 | Հայաստան | Մամլո հաղորդագրություն
Վարչապետ Տիգրան Սարգսեանն ընդունել է Աւստրալիայի վարչապետի Արեւելեան Եւրոպայի, Բալկանների եւ Կովկասի հարցերի յատուկ բանագնաց Ռասել Թրուդին:
«Հայաստանը շահագրգռուած է հայ-աւստրալիական յարաբերութիւնների զարգացման եւ խորացման գործում»,- ասել է Տիգրան Սարգսեանը` կարեւորելով երկկողմ եւ բազմակողմ ձեւաչափերում փոխադարձ աջակցութիւնը եւ հետաքրքրութիւն ներկայացնող հարցերի քննարկումը:
Ըստ ՀՀ Կառավարութեան տեղեկատուութեան եւ հասարակայնութեան հետ կապերի վարչութեան մամլոյ հաղորդագրութեան, Ռասել Թրուդը վարչապետին է ներկայացրել Աւստրալիայի կառավարութեան խնդրանքը` 2013-2014 թթ. ՄԱԿ-ի Անվտանգութեան Խորհրդում Աւստրալիայի թեկնածութեանն աջակցելու հարցում:
Տիգրան Սարգսեանը խոստացել է քննարկել հարցը եւ մինչ քուէարկութիւնը ներկայացնել Հայաստանի դիրքորոշումը:
Զրուցակիցները կարեւորել են ինչպէս տարբեր միջազգային կազմակերպութիւններում փոխադարձ աջակցութիւնը, այնպէս էլ երկու երկրների միջեւ տնտեսական կապերի խորացումը եւ այդ ուղղութեամբ գործնական քայլերի իրականացումը: