Յայտարարութիւն Ս.Յովակիմեանի եւ Վ.Քերոբեանի իրաւունքների խախտման վերաբերեալ. . |Անցել է աւելի քան երկու տարի Ստեփան Յովակիմեանին եւ Վահրամ Քերոբեանին 2010 թ. փետրուարի 6-ին Մոսկուա կինոթատրոնում 2010 թ. յունուարի 10-ին գողութիւն կազմակերպելու եւ իրականացնելու համար մեղադրանք առաջադրելուց յետոյ: Նրանք գրեթէ 28 ամիս կալանաւորուած են: Ս.Յովակիմեանի եւ Վ.Քերոբեանի գործի նախաքննութեան ընթացքում թոյլ են տրուել մարդու հիմնարար իրաւունքների բազմաթիւ կոպիտ խախտումներ` խոշտանգումների, դաժան եւ անմարդկային վերաբերմունք կիրառելու, ինչպէս նաեւ պաշտպան ունենալու իրաւունքը սահմանափակելու հետեւանքով Ս.Յովակիմեանից կորզուել է խոստովանական ցուցմունք, որը յետագայում դրուել է մեղադրանքի հիմքում: Դաժան վերաբերմունքի վերաբերեալ Ս.Յովակիմեանի բողոքների կապակցութեամբ ՀՀ իրաւասու մարմինները մինչ օրս արդիւնաւէտ քննութիւն չեն կատարել: ՀՀ դատական բոլոր ատեաններն ուժի մէջ են թողել խոշտանգումների փաստի վերաբերեալ քրէական գործի յարուցումը մերժելու մասին Յատուկ քննչական ծառայութեան որոշումը: Այս գործն արժանացել է բազմաթիւ իրաւապաշտպան կազմակերպութիւնների ուշադրութեանը: Դաժան վերաբերմունքի վերաբերեալ արդիւնաւէտ քննութիւն կատարելու, գործի քննութեան ողջամիտ ժամկէտները պահպանելու, անձնական ազատութեան իրաւունքը յարգելու վերաբերեալ պահանջով ՀՀ իշխանութիւններին են դիմել Մարդու իրաւունքների միջազգային ֆեդերացիան (FIDH) Հայաստանում իր անդամ կազմակերպութեան` Քաղաքացիական հասարակութեան ինստիտուտի հետ համատեղ : Ս.Յովակիմեանի եւ Վ.Քերոբեանի գործին անդրադարձ է կատարուել նաեւ ԱՄՆ Պետական Քարտուղարութեան` Մարդու իրաւունքների վերաբերեալ 2011թ. զեկոյցում: Մասնաւորապէս, յիշատակուել են ոստիկանութիւնում շարունակական ֆիզիկական եւ հոգեբանական բռնութեան հետեւանքով խոստովանութիւն կորզելու, կիրառուած դաժան վերաբերմունքի մասին յայտարարութիւնների վերաբերեալ անկախ հետաքննութիւն չիրականացնելու, գործի հիմքում միայն ինքնախոստովանական ցուցմունքներ դնելու պրակտիկային վերջ տալու խնդիրները: Դատական քննութիւնը շարունակաբար ձգձգւում է` անցնելով ողջամիտ ժամկէտները: Դատարանը յետաձգել է դաժան վերաբերմունքի հետեւանքով ձեռք բերուած ապացոյցների անթոյլատրելիութեան հաստատումը` յայտարարելով, որ այդ հարցին կ'անդրադառնայ միայն դատական քննութեան վերջում` խորհրդակցական սենեակում գործը լուծող վերջնական ակտ կայացնելու ժամանակ: Ըստ էութեան, խոստովանական ցուցմունքը հանդիսանում է մեղադրանքը հաստատող գլխաւոր ապացոյցը, եւ դրա անթոյլատրելիութիւնը հաստատուելու դէպքում ինքնաբերաբար առաջանալու է անհիմն երկար տեւողութեամբ կալանքի տակ ապօրինի պահուող երկու երիտասարդների արդարացման անհրաժեշտութիւնը եւ որպէս դրա հետեւանք` պետութեան պատասխանատուութիւնը: Մենք` հասարակական կազմակերպութիւնների ներկայացուցիչներս, պահանջում ենք ՀՀ իշխանութիւններից. • Կատարել խոշտանգումների յայտարարութիւնների անկախ, արդիւնաւէտ եւ լիարժէք քննութիւն; • Անթոյլատրելի ճանաչել բռնութեան եւ ճնշումների միջոցով ստացուած ապացոյցները; • Ապահովել մեղադրեալներիի ողջամիտ ժամկէտում արդար դատաքննութեան իրաւունքի իրականացումը; • Անյապաղ ազատ արձակել Ս. Յովակիմեանին եւ Վ. Քերոբեանին` կալանաւորումը փոխարինելով գրաւով»: «Քաղաքացիական հասարակութեան ինստիտուտ» ՀԿ նախագահ` Արման Դանիէլեան «Ընդդէմ իրաւական կ'ամայականութեան» ՀԿ նախագահ` Միքայէլ Արամեան «Հելսինկեան Քաղաքացիական Ասամբլէայի» Վանաձորի գրասենեակի նախագահ` Արթուր Սաքունց «Հայաստանի Հելսինկեան կ'ոմիտէ» իրաւապաշտպան ՀԿ նախագահ` Աւետիք Իշխանեան «Իրաւունքի եւ ազատութեան կ'ենտրոն» ՀԿ նախագահ` Վարդան Յարութիւնեան «Համագործակցութիւն յանուն ժողովրդավարութեան» ՀԿ նախագահ` Ստեփան Դանիէլեան «Մարդու Իրաւունքների Պաշտպանութեան Երեւանեան կ'ենտրոն» ՀԿ նախագահ` Սուրէն Իսկանդարեան

---