ՀՀ գլխաւոր դատախազութեան պետական շահերի պաշտպանութեան վարչութիւնում յարուցուել է քրէական գործ` դահկ ծառայութեան` Լոռու մարզային բաժնի նախկին հարկադիր կատարող Ա. Շախկուլեանի կողմից պաշտօնէական լիազօրութիւնները չարաշահելու փաստի առթիւ: Ինչպէս «Փաստինֆո» լրատուական գործակալութեանը տեղեկացրեց ՀՀ գլխաւոր դատախազի մամուլի քարտուղար Սոնա Տռուզեանը, ԴԱՀԿ ծառայութեան` Լոռու մարզային բաժնում կատարուած չարաշահումների վերաբերեալ ՀՀ ֆինանսների նախարարութիւնից ստացուած հաղորդման հիման վրայ ՀՀ գլխաւոր դատախազութեան պետական շահերի պաշտպանութեան վարչութիւնում նախապատրաստուած նիւթերով պարզուել է, որ ԴԱՀԿ ծառայութեան յիշեալ բաժնի աշխատակից Ա. Շախկուլեանը քաղաքացի Վ. Յովհաննիսեանից 249 766 դրամ յօգուտ բանկի բռնագանձելու նպատակով վերջինիս շարժական գոյքի, այդ թւում` կահոյքի, աւտոմեքենայի եւ այլ գոյքերի առկայութեան պայմաններում, բռնագանձումը տարածել է սեփականութեան իրաւունքով պատկանող, Վանաձոր քաղաքում գտնուող բնակարանի վրայ եւ այն իրացրել: Մասնաւորապէս` Լոռու մարզի ընդհանուր իրաւասութեան առաջին ատեանի դատարանի` 2010թ. հոկտեմբերի 15-ին յարուցած կատարողական վարոյթի շրջանակներում իրականացրած կատարողական գործողութիւնների ընթացքում Ա. Շախկուլեանը խախտել է «դատական ակտերի հարկադիր կատարման մասինէ ՀՀ օրէնքի 43-րդ յօդուածի 4-րդ մասի 2-րդ կէտով սահմանուած պահանջը, համաձայն որի` կատարողական գործողութիւնների ընթացքում բռնագանձումն առաջին հերթին տարածւում է ֆիզիկական անձանց շարժական գոյքի վրայ: Արդիւնքում` Վ. Յովհաննիսեանին պատճառուել է 7 289 000 դրամի վնաս: Դէպքի առթիւ ՀՀ գլխաւոր դատախազութեան պետական շահերի պաշտպանութեան վարչութիւնում յարուցուել է քրէական գործ` ՀՀ քրէական օրէնսգրքի 308-րդ յօդուածի 2-րդ մասով: Քրէական գործն ուղարկուել է ՀՀ յատուկ քննչական ծառայութիւն` նախաքննութիւն կատարելու համար: «Փաստինֆո» լրատուական գործակալութիւն

---