ՀՀ գլխաւոր դատախազ Աղուան Յովսէփեանը միջնորդագիր է ներկայացրել Ազգային ժողով, որպէսզի ԲՀԿ-ական պատգամաւոր Վարդան Օսկանեանին որպէս մեղադրեալ ընդգրկելու համաձայնութիւն տալու մասին որոշում կայացուի: Այդ կ'ապակցութեանբ վարդան Օսկանեանը հանդէս է եկել յայտարարութեամբ, որտեղ ասուած է. «Պատգամաւորական անձեռնմխելիութիւնից ինձ զրկելու գլխաւոր դատախազի` Ազգային ժողով ներկայացրած միջնորդագիրը միանշանակօրէն համարում եմ քաղաքական պատուէր: Առաջին օրուանից, երբ Ազգային անվտանգութեան ծառայութիւնը յարուցեց քրէական գործը, ինձ համար պարզ էր, որ սա քաղաքական պատուէր է, քանի որ յարուցուած գործը զուրկ էր որեւէ իրաւաբանական բովանդակութիւնից: Ես պաշտօնապէս դեռ չեմ ստացել անձեռնմխելիութիւնից ինձ զրկելու միջնորդագիրը, ուստի չեմ ուզում ենթադրել` կոնկրէտ ինչ մեղադրանք է լինելու: Մինչ այժմ խօսքը եղել է «փողերի լուացման», «հարկային պարտաւորութիւններից չարամտօրէն խուսափելու» կամ «գումար իւրացնելու» մասին: Չեմ զարմանայ, եթէ այլ անհեթեթ մեղադրանքներ լինեն: Անկախ նրանից, թէ այս անգամ ինչ մեղադրանք են նախատեսել ինձ համար, դա որեւէ իրաւական հիմք չի կարող ունենալ: Ինձ համար սա քաղաքական պայքարի նոր հանգրուան է: Չնայած որ պայքարի այս հարթութիւնը իմ հարթութիւնը չէ, բայց ես պատրաստ եմ մինչեւ վերջ պայքարել: Եթէ այս ամէնի նպատակը իմ քաղաքական գործունէութիւնը կաշկանդելն է եւ բոլոր բնագաւառներում ձախողած իշխանութիւնների նկատմամբ իմ քննադատութիւնը լռեցնելը, ապա միանաշանակ կարող եմ ասել, որ իշխանութիւնները նաեւ այս հաշուարկներում են սխալուել: Ես պատրաստ եմ թէկուզ այս պայմաններում եւ այս հարթութեան վրայ շարունակել իմ պայքարը երկրում իրական փոփոխութիւնների հասնելու համար»: Վարդան Օսկանեանի փաստաբան Տիգրան Աթանէսեանն էլ իր հերթին մեկնաբանել է, որ «Համաձայն Ազգային ժողովի կանոնակարգի` Ազգային ժողովի նախագահը, ստանալով գլխաւոր դատախազի միջնորդագիրը պատգամաւորին անձեռնմխելիութիւնից զրկելու մասին, պարտաւոր է այդ մասին անմիջապէս տեղեկացնել պատգամաւորին, ինչը այս դէպքում չի կատարուել եւ, ըստ էութեան, օրէնքի խախտում է: Սա օրէնքի բացայայտ արհամարհանք է եւ անուղղակիօրէն հաստատում է Վարդան Օսկանեանի` քաղաքական հետապնդման վերաբերեալ վարկածը»:

---