Իշխանութիւնները կատարում էն եւ իրենց, եւ ընդդիմութեան գործը՝ մի կողմից խնդիրներին լուծումներ էն տալիս, միւս կողմից՝ գտնում սեփական թերութիւնները, քննադատութիւն հնչեցնում։ Այս մասին մարտի 17-ի ասուլիսում յայտարարեց իշխող Հանրապետական կուսակցութեան փոխնախագահ, խորհրդարանական «ՀՀԿ» խմբակցութեան ղեկավար Գալուստ Սահակեանը, յաւելելով՝ «շատ լաւ կը լինի, որ ընդդիմութիւնը այնպիսի վերլուծութիւններ ներկայացնի, որ օժանդակի իշխանութիւնների գործունէութեանը»։ Գ.Սահակեանն ընդգծեց. որ երկրի ղեկավար Սերժ Սարգսեանը այս կամ այն ոլորտում թերութիւնների մասին խօսելով, յանձնարարականներ տալով կատարում է իր գործառոյթները՝ իր պաշտօնավարութեան առաջին իսկ օրից որդեգրած գործելաոճով, եւ արդիւնքները ակնյայտ կլինէն առաջիկայ ամիսներին։ «Արդեօ՞ք Սերժ Սարգսեանի վերջին հրապարակային յայտարարութիւնները Հայ Ազգային կոնգրէսի պահանջագրի պատասխանն է» հարցի վերաբերեալ ՀՀԿ փոխնախագահը նկատեց, թէ ընդդիմութիւնը կարող է ասել, որ «իշխանութիւնները արդէն տեղի էն տալիս»։ Միաժամանակ նա ընդգծեց, որ ընդդիմութեան հարցադրումների վերնագիրը կարելի է փոխել եւ այն կը վերաբերի ցանկացած պետութեանը։ ՀՀԿ փոխնախագահը նորմալ չի համարում, որ բացայայտուած չէն 2008թ. մարտի 1-2-ի դէպքերի ժամանակ զոհուած 10 անձանց սպանողները։ Դրա համար, ըստ նրա, անհրաժեշտ է հարցաքննել բոլոր կողմերին՝ գոնէ որպէս վկայ, եւ «բացայայտումներ կլինէն»։ Գ.Սահակեանը ձեռնպահ մնաց բռնցքամարտիկ Սամսոն Խաչատրեանի դէմ յարուցուած քրէական գործի վերաբերեալ մեկնաբանութիւններ անելուց, սակայն նշեց, որ Ս.Խաչատրեանը մեծ ծառայութիւններ է մատուցել հայկական սպորտին, թէեւ խառնուածքով «հախուռն է եւ անզուսպ»։ Գ.Սահակեանը ցաւալի է համարում «Ժառանգութիւն» կուսակցութեան առաջնորդ Րաֆֆի Յովհաննիսեանի հացադուլի դիմելը, սակայն չի գտնում, թէ հիմնական խնդիրը արտահերթ ընտրութիւններն են։ Ըստ նրա, Ր.Յովհաննիսեանի յայտարարութիւններում վերացականութիւն կայ. «Ինձ համար գոնէ չհիմնաւորուած հացադուլ է յայտարարել»։ Ր.Յովհաննիսեանը իր ակցիայի շնորհիւ նուաճեց Ազատութեան հրապարակը դիտարկմանն ի պատասխան Գ.Սահակեանը նշեց. «Մեր իրականութեան մէջ ցանկացած ազնիւ մղում դառնում է քաղաքական շահարկումների առարկայ եւ սենսացիայ՝ Ազատութեան հրապարակը վաղուց գրաւուած է, մեր ժողովրդինն է, մեր հանրութեանը»։ Գ.Սահակեանը ի պատասխան հարցերից մէկի, յայտարարեց, որ ռուս-թուրքական յարաբերութիւնների ջերմացումը, «նոյնիսկ ծրագրային մօտեցումներով հանդէս գալը» ցանկալի չէ եւ չի բխում Հայաստանի շահերից, որովհետեւ Ռուսաստանը Հայաստանի ռազմավարական գործընկներն է։ Նա միաժամանակ ընդգծեց, որ Թուրքիան եւ Ռուսաստանը մեծ տէրութիւններ էն, պէտք է փոխյարաբերութիւնների մէջ լինէն միմեանց հետ։ «Մենք էլ ուզում ենք, որպէսզի հայ-թուրքական արձանագրութիւնները ստորագրուէն, եւ փոխյարաբերութիւններ ունենանք Թուրքիայի հետ՝ առանց նախապայմանների։ Դրանք դիւանագիտական փոխյարաբերութիւններ էն, եւ չի կարելի շփոթել քաղաքական փոխյարաբերութիւնների հետ»,- ասաց Գ.Սահակեանը։

---