Արդէն ամենամեայ «Հայ Դատն այսօր» խորհրդաժողովներն իրականութիւն են մեր համայնքի հասարակա-քաղաքական կեանքում՝ մեզանից քւրաքանչիւրին առիթ ընձեռելով աւելի խորքային ամփոփելու Հայ Դատին, նրանից ակունք առնող հիմնահարցերն ու զարգացումները՝ դրանով իսկ ինքներս մեզ «վերաորակաւորելով» ազգային հրատապ խնդիրներում՝ անշուշտ եւ աներկբայօրէն քաղաքագէտ մտաւորականների ու փորձագէտների աչալուրջ մասնակցութեան շնորհիւ, որոնք արդէն 9-րդ անգամ ամենայն պատասխանատւութեամբ իրենց մասնակցութիւնն են բերում խորհրդաժողովին՝ Հայաստանից, Միջին Արեւելքից, Եւրոպայից, Արցախից ու.... Այս անգամ «ՀՈՒՍԿ» հաստատութեան կազմակերպած խորհրդաժողովը հիւրընկալեց՝ գրեթէ բոլոր խորհրդաժողովների ակնառու մասնակից ՀՅԴ Բիւրոյի Հայ Դատի եւ քաղաքական հարցերի գրասենեակի պատասխանատու Կիրօ Մանոյեանին, Եւրոպայի Հայ Դատի գրասենեակի պատասխանատու Գասպար Կարապետեանին, ՀՅԴ Արցախի Կենտրոնական կոմիտէի անդամ, պատմաբան Լեռնիկ Յովհաննիսեանին, թուրքագէտ, պատմական գիտութիւնների թեկնածու Արտակ Շաքարեանին եւ աւագ գիտաշխատող, գիտութիւնների թեկնածու, իրանագէտ, դոցենտ Գոհար Իսկանդարեանին: Խորհրդաժողովի շրջանակներից դուրս, բայց անմիջականօրէն նրանց գործունէութեան ոլորտներին առնչւող հարցերի շուրջ հարցազրոյցներ ենք կազմակերպել զեկուցաբեր-մասնակիցների հետ, որոնց մասին արդէն վերեւում շեշտեցինք: Հարցազրոյցները յանձնում ենք ընթերցողների ուշադրութեան՝ չզլանալով եւս մէկ անգամ նշել «ՀՈՒՍԿ»-ի անմնացորդ ներդրումը՝ խորհրդաժողովի իրականացման աշխատանքներում: Կ. Մանոյեան. «Որտեղ որ մեր ուժերը համախմբելու խնդիր կայ, պետութեան կողմից հովանաւորութիւնը անհրաժեշտութիւն է» «Ալիք»-ի հարցազրոյցը՝ ՀՅԴ Հայ Դատի եւ քաղաքական հարցերի գրասենեակի պատասխանատու Կիրօ Մանոյեանի հետ Հ.- Պրն. Մանոյեան, Դուք ակտիւ ներգրաււածութիւն ունէք Հայաստանի պետութեան կողմից Ցեղասպանութեան 100-ամեակի աշխատանքները պետական մակարդակով համակարգող խորհրդի կազմում եւ նաեւ վերջերս զեկոյցով մասնակցեցիք Սփիւռքի նախարարութեան նախաձեռնութեամբ կազմակերպւած «100-ամեակին ընդառաջ» Լրագրողների համահայկական 6-րդ խորհրդաժողովին, ինչպիսի՞ զուգահեռներ կանցկացնէիք եւ ինչպէ՞ս էք գնահատում նմանատիպ աշխատանքները: Պ.- Պետական յանձնաժողովի աշխատանքները, հակառակ, որ յանձնաժողովի նշանակումից անցել է մօտ մէկուկէս տարի, դեռ կարելի է ասել, որ նախնական փուլում են, որովհետեւ ընդհանուր ռազմավարութիւնը այս երկրորդ ժողովին խօսւեց, բայց տակաւին վերջնականացած չէ: Եւ այդ աշխատանքը շուտով յուսով ենք, որ կաւարտւի եւ դրա հիման վրայ էլ պետական յանձնաժողովի կողմից կազմակերպւելիք աշխատանքները արդէն ընթացքի մէջ կը մտնեն: Կայ նախաձեռնութիւնների մի ցուցակ, որը ժողովում էլ ասւեց, որ պետական յանձնաժողովի մակարդակի նախաձեռնութիւններ չեն, դրանք կարող են տեղի ունենալ, բայց ոչ անպայման որպէս պետական յանձնաժողովի աշխատանքներ: Եւ ինչ վերաբերում է խորհրդաժողովին կամ հաւաքին,ես ողջ ժողովին չեմ մասնակցել, բայց այդտեղ կարծես աւելի շատ արտայայտւել էին կարծիքներ, գոնէ այն նիստին, որ ես մասնակցել եմ, արտայայտւեցին ոչ միայն լրատւամիջոցների կամ լրագրողների կողմից կատարւելիք աշխատանքների մասին, այլ՝ ընդհանրապէս եւ ուրեմն, կարծում եմ, նման հաւաքների այսինքն՝ լրատւամիջոցների աշխատանքների հաւաքները, կարեւոր են, բայց ինչքան ժողովում էլ կարծես հնչել է որոշ անհատների կողմից տեսակէտ, որ հաւանաբար ճիշտ կը լինի, որ առնւազն լրատւամիջոցները, այլ պարագաները կարող է այլ լուծում գտնեն, բայց լրատւամիջոցներինը պետութեան կողմից չկազմակերպւի եւ պետութիւնը աջակցի ինչ-որ չափով, պետութիւնը իր ասելիքը ունենայ, բայց ոչ թէ պետութիւնը ասենք էսպէս ամբողջական հակակշիռ ունենայ այդ հաւաքի վրայ: Բայց կարող է այլ բնոյթի նման հաւաքներ, որտեղ մեր ուժերը համախմբելու խնդիր կայ, պետութեան կողմից ամբողջական հովանաւորութիւն ստանայ, որը աւելի արդիւնաւէտ կը լինի, բայց արդէն լրագրողների հաւաքի մէջ հնչած տեսակէտները, վերջում առանձին անհատների հետ խօսակցութիւնները այն տպաւորութիւնը թողեցին ինձ վրայ, որ այնքան էլ գոհ չեն եղել, որ անպայման պէտք է պետութեան կողմից ամբողջովին հովանաւորւի, որովհետեւ ամէն անգամ, որ իշխանութիւններին քննադատելու հարց լինի, անպայման ներկայ նախարարը ստիպւած է զգում պատասխանել, որը արդէն ուրիշ ուղղութեամբ է տանում համաժողովը: Հարցազրոյցը վարեց ԱՐՄԻՆԷ ԷԼԻԱԶԵԱՆԸ «ԱԼԻՔ» օրաթերթ

---