Նոյեմբերի 14-ին Ազգային անվտանգութեան խորհրդի քարտուղար Արթուր Բաղդասարեանի նախագահութեամբ տեղի է ունեցել Հայաստանի Հանրապետութեան էներգետիկ անվտանգութեան հայեցակարգի նախագծի մշակման միջգերատեսչական աշխատանքային խմբի հերթական նիստը: Էներգետիկ անվտանգութեան հայեցակարգի մշակումը նախատեսուած է <<Հայաստանի Հանրապետութեան ազգային անվտանգութեան ռազմավարութեամբ>>: Կարեւորելով էներգետիկ անվտանգութիւնը` որպէս մեր երկրի ազգային անվտանգութեան բաղկացուցիչներից մէկը, Արթուր Բաղդասարեանը, նշել է, որ էներգետիկ անվտանգութեան հիմնական խնդիրը պէտք է լինի Հայաստանի էներգետիկ ինքնաբաւութեան մակարդակի ապահովումը թէ կարճաժամկէտ եւ թէ երկարաժամկէտ հեռանկարում: Արթուր Բաղդասարեանի տեղեկացմամբ Էներգետիկ անվտանգութեան հայեցակարգը արդէն մշակուած է. <<Երկու տարուայ աշխատանքի արդիւնքում, միջգերատեսչական խմբի շրջանակներում, մշակել ենք Էներգետիկ անվտանգութեան ռազմավարութիւնը, որը մինչեւ այս տարուայ աւարտը կը քքնարկուի նաեւ Անվտանգութեան խորհրդի նիստում: Էներգետիկ անվտանգութեան ռազմավարութիւնը կարեւորագոյն փաստաթուղթ է մեր երկրի ազգային անվտանգութեան ապահովման տեսանկիւնից` հաշուի առնելով նաեւ Հայաստանում եւ տարածաշրջանում տեղի ունեցող զարգացումները: Փաստաթուղթը, որի մէջ ներառուած են շուրջ 120 առաջարկութիւններ, պատրաստ է քննարկման, իսկ դրա ընդունմամբ մենք շատ կարեւոր քայլ ենք կատարում ոչ միայն մեր միջազգային պարտաւորութիւնների կատարման տեսանկիւնից, այլ նաեւ մեր Ազգային անվտանգութեան ռազմավարութեամբ նախատեսուած դրոյթները կեանքի կոչելու առումով>>: Միջգերատեսչական աշխատանքային խումբը հաւանութեան արժանացրեց Էներգետիկ անվտանգութեան հայեցակարգը եւ որոշում ընդունեց այն ներկայացնել Անվտանգութեան խորհուրդ հաստատման:

---